O‘zbekiston Respublikasi Iqtisodiyot va moliya vazirligi

Tashrif davomida xodimlar  malakali gid hamrohligidagi axborot-tanishuv ekskursiyasining dastlabki bosqichida Markazda inson sivilizatsiyasining tosh davridan boshlab bugungi kungacha boʻlgan rivojlanish davrlari zamonaviy yondashuv asosida yoritilganligining guvohi boʻlishdi. Bu esa tashrif buyuruvchilarga insoniyat taraqqiyotini yaxlit va tizimli ravishda anglash imkonini berdi.
 

Ekskursiya mobaynida islom sivilizatsiyasining koʻp asrlik tarixi, insoniyat taraqqiyotining ilk bosqichlaridan tortib to bugungi kungacha boʻlgan rivojlanish yoʻli haqida batafsil maʼlumotlarga ega boʻldilar. Shuningdek, Markazda yaratilgan sharoitlar, boy ekspozitsiyalar va yangi tashabbuslar, ayniqsa, buyuk shaxslarning sohibqiron Amir Temur, Alisher Navoiy, Zahiriddin Muhammad Bobur, Abu ali Ibn Sino va boshqa allomalarning hayoti va faoliyatiga bagʻishlangan boʻlimlar ishtirokchilarda katta qiziqish uygʻotdi. Ularning jahon ilm-fani va madaniyatiga qoʻshgan ulkan hissasi zamonaviy texnologiyalar asosida taʼsirchan tarzda namoyish etilgani alohida eʼtirofga sazovor.
 

Markaz qadimiy va milliy meʼmorchilik anʼanalari asosida qurilgan boʻlib, temuriylar davri kulolchilik namunalari, Amir Temur davrida koʻchirilgan yirik Umar Aqtoʼ Qurʼonining parchalari, temuriylar davri arxitektura yodgorliklariga tegishli koshin boʻlaklari, boburiylar davriga mansub qurol-aslaha, dubulgʻa, qalqon, qilich va sovut parchalari haqida ham batafsil maʼlumot berildi. Eʼtiborli jihati, Markazdagi interaktiv ekspozitsiyalar orasida Buyuk Ipak yoʻlining tarixi va uning sivilizatsiyalar taraqqiyotidagi oʻrniga bagʻishlangan boʻlimidagi  savdo yoʻllari, madaniyatlar almashinuvi va xalqlar oʻrtasidagi aloqalar zamonaviy multimedia vositalari orqali jonli tarzda yoritilgani tashrif buyurganlarda katta taassurot qoldirdi. 
 

Shu bilan birga, ekspozitsiyalarda Yangi Oʻzbekiston taraqqiyotiga alohida eʼtibor qaratilgan. Unda mamlakatimizda amalga oshirilayotgan islohotlar, xalqaro maydonda qoʻlga kiritilayotgan yutuqlar, jumladan, sport boʻyicha olimpiada gʻoliblari haqida interaktiv maʼlumotlar taqdim etilgan. Shuningdek, Yangi Oʻzbekistonning istiqbolli taraqqiyot yoʻnalishlari, zamonaviy arxitektura va innovatsion texnologiyalarni oʻz ichiga olgan maketlari  oʻziga xos zamonaviy yondashuvni namoyon etgan.
 

Maʼlumot uchun qayd etib oʻtish joizki, Islom sivilizatsiyasi markazi maydoni va qamroviga koʻra, dunyoda islom tarixi, madaniyati va sivilizatsiyalarini oʻrganish hamda targʻib etishga qaratilgan yirik majmualardan biri hisoblanadi. U Toshkentning mashhur Hazrati Imom majmuasi hududidagi 10 gektar maydonda barpo etilgan. Bino uch qavatdan iborat boʻlib, uzunligi 161 metr, eni 118 metrni tashkil etadi. Gumbazining balandligi 65 metr, umumiy foydalanish hududi esa 42 ming kvadrat metrdan ziyod. Markazda, shuningdek:
 

 • noyob qoʻlyozmalar va qadimiy manbalar;
 

 • ularni saqlash va restavratsiya qilish jarayonlari;
 

 • raqamlashtirish va ilmiy tadqiqot ishlari;
 

 • zamonaviy multimedia va virtual ekspozitsiyalar bilan tanishish imkoniyati yaratilgan.
 

Tashrif ishtirokchilari Maʼnaviy sayohat davomida tashrif ishtirokchilari, nafaqat, buyuk sarkarda va davlat arbobi Amir Temur bobokolonimiz hayoti va faoliyati, uning boy tarixiy merosi hamda davlatchilik anʼanalari bilan yaqindan tanishib,  yangi bilimlarga ega boʻldilar, balki maʼnaviy jihatdan boyib, milliy merosimizga boʻlgan hurmat va iftixor tuygʻulari yanada mustahkamlandi.
 

Taʼkidlash joizki, bu kabi maʼnaviy-maʼrifiy tashriflar davlat xizmatchilarida milliy qadriyatlarga sadoqat, tarixiy merosga ehtirom va maʼnaviy barkamollikni yuksaltirishda muhim ahamiyat kasb etadi.