Xitoy Davlat kengashining Taraqqiyot tadqiqotlari markazi rahbari bilan uchrashuv bo‘lib o‘tdi
2026-04-01 21:30:00 / Vazirlik yangiliklari
Uchrashuvda Xitoy Davlat kengashining Taraqqiyot tadqiqotlari markazining Xalqaro hamkorlik departamenti boshlig‘i Yu Jun, Resurslar va ekologik siyosat instituti direktori Gao Shiji hamda Iqtisodiyot va moliya vazirligi departament boshlig‘i Abdumalik Jalilov, O‘zbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti direktorining birinchi o‘rinbosari Zamon Xoldorov va boshqa mas’ul vakillar ishtirok etdi.
Muloqot davomida tomonlar O‘zbekiston va Xitoy o‘rtasidagi strategik sheriklik munosabatlari doirasida ijtimoiy-iqtisodiy aloqalarni yanada rivojlantirish va hamkorlikni ustuvor yo‘nalishlar bo‘yicha kengaytirish masalalarini muhokama qildi.
Muhokamalar davomida mamlakatimizdagi joriy makroiqtisodiy holat, iqtisodiy o‘sish sur’atlari, inflatsiyani barqarorlashtirish choralari, xususiy sektorni qo‘llab-quvvatlash hamda aholi farovonligini oshirishga qaratilgan islohotlar yuzasidan fikr almashildi. Shuningdek, mamlakatda amalga oshirilayotgan keng ko‘lamli ijtimoiy-iqtisodiy islohotlar va ularning natijalariga alohida to‘xtalib o‘tildi.
Shuningdek, “yashil” energetika, kimyo sanoati, infratuzilmani rivojlantirish, transport va logistika sohalarida qo‘shma loyihalarni amalga oshirish istiqbollari hamda energiya samaradorligini oshirish, qayta tiklanuvchi energiya manbalarini keng joriy etish va barqaror iqtisodiy o‘sishni ta’minlash bo‘yicha hamkorlikni kuchaytirish masalalariga alohida e’tibor qaratildi.
Muzokaralarda kambag‘allikni qisqartirish, ijtimoiy himoya tizimini takomillashtirish, raqamli iqtisodiyot va IT sohasida ilmiy tadqiqotlar o‘tkazish, innovatsion yondashuvlarni joriy etish hamda kreativ iqtisodiyotni rivojlantirish bo‘yicha hamkorlikni yo‘lga qo‘yish masalalari ham muhokama qilindi.
Shu bilan birga, uchrashuv doirasida O‘zbekiston Respublikasi Vazirlar Mahkamasi huzuridagi Makroiqtisodiy va hududiy tadqiqotlar instituti hamda Xitoy Xalq Respublikasi Davlat kengashining Taraqqiyot tadqiqotlari markazi o‘rtasida Anglashuv memorandum imzolandi.
Uchrashuv yakunida tomonlar o‘zaro manfaatli hamkorlikni izchil davom ettirish, yangi qo‘shma tashabbus va loyihalarni amalga oshirish hamda ikki tomonlama munosabatlarni yanada mustahkamlashga tayyor ekanliklarini bildirdi.
Iqtisodiyot va moliya vazirligi
Axborot xizmati va kommunikatsiyalar boshqarmasi