Institutsional baholash va takomillashtirish bo‘yicha tavsiyalar
2024-06-14 12:15:00 / Vazirlik yangiliklari
Ushbu baholash doirasida Iqtisodiyot va moliya vazirining birinchi o‘rinbosari Ilhom Norqulov, vazir o‘rinbosarlari — Axadbek Xaydarov va Jasur Karshibayev hamda vazirlikning mas’ul mutaxassislari ishtirokida seminar o‘tkazildi. Seminarda Jahon banki tomonidan loyihani umumiy muvofiqlashtirish va boshqarish uchun mas’ul bo‘lgan davlat boshqaruvi va davlat sektori bo‘yicha katta mutaxassis Kay Aleksandr Kayzer boshchiligidagi bankning mutaxassislari qatnashdi va hisobot taqdim etdi.
Baholash siyosatni muvofiqlashtirish va nazorat qilish, milliy rivojlanish va iqtisodiy rejalashtirish, davlat investitsiyalarini boshqarish, makroiqtisodiy va fiskal siyosat, budjetni rejalashtirish, aktivlar va moliya boshqaruvi, xalqaro hamkorlik va davlat qarzini boshqarish, shuningdek, inson resurslarini va tashkilot madaniyati rivojlantirish kabi bir nechta muhim yo‘nalishlarni qamrab oldi .
Milliy rivojlanish strategiyasi va iqtisodiy siyosat o‘rtasidagi uyg‘unlikni ta’minlash, strategik milliy rejalashtirish va ijtimoiy sohadagi funksiyalarni birlashtirish bo‘yicha ixtisoslashtirilgan direksiyani tashkil etish, davlat dasturlari va loyihalarini muvofiqlashtirishni takomillashtirish bo‘yicha ham takliflar ko‘rib chiqildi.
Hisobotni taqdim etish jarayonida samarali va konstruktiv muloqot, tavsiya va takliflar muhokamasi bo‘lib o‘tdi. Ishtirokchilar taqdim etilgan tashabbuslarga qiziqish bildirib, bunday o‘zgarishlar milliy iqtisodiy strategiyalarni muvaffaqiyatli amalga oshirish va davlat resurslarini boshqarishni takomillashtirishga hissa qo‘shib, faoliyat samaradorligini sezilarli darajada oshirishi mumkinligini ta’kidladi.
Iqtisodiyot va moliya vazirligi
Axborot xizmati