Ushbu qaror bilan Davlat organlari va tashkilotlarida ichki audit faoliyatini raqamlashtirish konsepsiyasi va uni amalga oshirish yuzasidan “Yoʻl xaritasi” tasdiqlandi hamda Vazirlar Mahkamasining 2025-yil 16-iyuldagi 446-son qarori bilan tasdiqlangan 2025–2027-yillarda respublika va mahalliy ijro etuvchi hokimiyat organlarida ichki nazorat tizimini yanada takomillashtirish konsepsiyasiga ichki nazorat tizimini raqamlashtirishga oid oʻzgartirish va qoʻshimchalar kiritildi.

Konsepsiyada quyidagilar nazarda tutilgan:

• davlat ichki audit va nazorati tizimini raqamlashtirishdagi tizimli muammolarni bartaraf etishda yagona va yaxlit markazlashgan raqamli ekotizimni joriy etish;
• xorijiy mamlakatlarda ichki audit va ichki nazorat tizimini raqamlashtirishning umumiy tendensiyasi va asosiy xulosalar;
• davlat ichki audit va ichki nazorat faoliyatiga raqamli texnologiyalarni joriy etish, muvofiqlashtirish hamda baholash jarayonlarini raqamlashtirish, shuningdek malakali kadrlar tayyorlash va ularning malakasini oshirib borishga oid ustuvor yoʻnalishlar;
• konsepsiyani amalga oshirish asosida ichki audit va nazorat faoliyatini raqamlashtirishdan kutilayotgan natijalar.

Shuningdek, qarorga muvofiq, 2027–2028-yillar davomida ichki audit faoliyati, xavflarni boshqarish va ichki nazorat tizimini oʻz ichiga qamrab olgan “Davlat ichki auditi” axborot tizimi ishlab chiqilishi hamda vazirlik va idoralarning tegishli axborot tizimlariga integratsiya qilinishi belgilanmoqda.

Natijada, yaratiladigan axborot tizimi asosida ichki audit va nazorat faoliyatida avtokameral va avtoprofiklatika, avtomatik baholash hamda masofaviy monitoring tizimlaridan foydalanish orqali davlat budjeti mablagʻlaridan maqsadsiz va samarasiz foydalanish holatlarining oldi olinishiga erilishadi.

Shu bilan birga, ichki audit, xavflarni boshqarish va nazorat jarayonlarini raqamlashtirish orqali ularda inson omilini qisqartirish, sun’iy intellektdan foydalanish orqali audit tadbirlari qamrovi, sifati va samaradorligini oshirish imkoniyati yaratiladi.

Iqtisodiyot va moliya vazirligi

Axborot xizmati va kommunikatsiyalar boshqarmasi