Ichki va tashqi davlat auditini rivojlantirish, budjet jarayonini takomillashtirish masalalariga bag‘ishlangan seminar bo‘lib o‘tdi
2024-06-06 20:20:00 / Vazirlik yangiliklari
O‘zbekiston Iqtisodiyot vazirligi tomonidan seminarda Davlat organlarining ichki audit tuzilmalari faoliyatini rivojlantirish va muvofiqlashtirish boshqarmasi boshlig‘i Azamat Jabborov va boshqarma xodimlari, O‘zbekiston Iqtisodiyot vazirligi huzuridagi Moliya organlari hamda budjet tashkilotlarining moliya-hisob boʻlinmalari xodimlarini tayyorlash va qayta tayyorlash oʻquv markazi direktori Iroda Hamidova, O‘zbekiston Iqtisodiyot vazirligi huzuridagi budjetdan tashqari pensiya jamg‘armasi xodimlari va Budjet-soliq ilmiy tadqiqotlar instituti xodimlari ishtirok etdilar.
Ikki tomonlama dastur eksperti Svetlana Tabalina “Tashqi va ichki davlat moliyaviy nazorati va audit organlarining o‘zaro ta’sirining xalqaro standartlari” taqdimoti bilan so‘zga chiqdi. O‘z taqdimotida 2025-yilda kuchga kiradigan yangi xalqaro audit standartlarini batafsil tahlil qildi.
Shuningdek, hozirgi kunda amalda bo‘lgan INTOSAI standartlari va qo‘llanmalari hamda ularning O‘zbekiston Respublikasi Iqtisodiyot va Moliya vazirligi uchun amaliy foydalari ko‘rib chiqildi. Shuningdek, seminarda davlat auditining organlari va ichki auditorlar o‘rtasidagi hamkorlikning ta'siri, ularning yuzaga kelishi mumkin bo‘lgan xatarlari va o‘zaro ta'sir shakllari ko‘rib chiqildi.
Kunning ikkinchi yarmida Rossiya Federatsiyasi Moliya vazirligi ilmiy tadqiqot instituti maslahatchisi Igor Kovtun moderatorligida “Oʻzbekiston Respublikasida dasturiy budjetlashtirish tizimini joriy etishni takomillashtirish” mavzusida seminar boʻlib oʻtdi.
Tomonlar Oʻzbekistonda dasturiy budjetlashtirishni amalga oshirish boʻyicha erishilgan natijalarni muhokama qildilar. Bunda, Iqtisodiyot va moliya vazirligi Davlat budjeti siyosati departamenti Budjet xarajatlari samaradorligini baholash va budjetni rejalashtirishning dasturiy maqsadli uslublarini joriy etish boʻlimi boshligʻi Sherxon Sayfutdinov dasturiy budjetlashtirish tizimini samarali joriy etish boʻyicha “Yoʻl xaritasi” ishlab chiqilganligini, unda 2030-yilgacha aniq vazifalar belgilanganligini taʼkidlab oʻtdi.
Shuningdek, ushbu tizimni takomillashtirish boʻyicha Oʻzbekiston Respublikasi Vazirlar Mahkamasining 2024-yil 4-yanvarida “Oʻzbekiston Respublikasida dasturiy budjetlashtirish tizimini joriy etishda budjet mablagʻlarini taqsimlovchilarning budjet dasturlarini ishlab chiqish, monitoringini yuritish va ularning samaradorligini baholash tartibi toʻgʻrisidagi nizomni tasdiqlash xakida” 4-sonli qarori qabul qilinganligi va mazkur nizomga muvofiq 2025-yil uchun Iqtisodiyot va Moliya vazirligi hamda Qishloq xoʻjaligi vazirligining budjet xarajatlarini budjet dasturlari kesimida ishlab chiqilganligi va kelgusi yil uchun Fiskal strategiyada aks ettirilganligini taʼkidladi.
Shundan soʻng, Rossiya Federatsiyasi Moliya vazirligi ilmiy tadqiqot instituti eksperti Leonid Bogdanov “Oʻzbekiston Respublikasida Dasturiy budjetlashtirish tizimi natijalarini monitoring qilish va baholashning zamonaviy tendensiyalarini joriy etish va hal qilinishi kerak boʻlgan vazifalar” mavzusida taqdimot qildi.
Seminar yakuni boʻyicha:
- Oʻzbekiston Respublikasida dasturiy budjetlashtirish tizimini takomillashtirish chora-tadbirlari rejasi;
- Iqtisodiyot va moliya vazirligi va boshqa manfaatdor vazirliklar xodimlarini dasturiy budjetlashtirish tizimini takomillashtirish yuzasidan institutsional salohiyatlarini oshirish yuzasidan oʻquv dasturini muhokama qilish hamda xamkorlik doirasida amalga oshiriladigan ishlar kelishib olindi.
Iqtisodiyot va moliya vazirligi
Axborot xizmati