O‘zbekiston va Turkiya o‘rtasida sog‘liqni saqlash sohasidagi hamkorlik istiqbollari muhokama qilindi
2026-01-30 11:45:00 / Vazirlik yangiliklari
Muloqot chog‘ida O‘zbekiston va Turkiya o‘rtasidagi o‘zaro manfaatli hamkorlikni sog‘liqni saqlash yo‘nalishida izchil rivojlantirish masalalari ko‘rib chiqildi. Tomonlar tibbiyot sohasida tajriba almashish, zamonaviy yondashuvlarni o‘rganish hamda sohada olib borilayotgan islohotlarni qo‘llab-quvvatlash bo‘yicha fikr almashdi.
Uchrashuv davomida hududlarda ko‘rsatilayotgan tibbiy xizmatlar samaradorligini oshirish, tibbiyot muassasalari faoliyatini takomillashtirish hamda boshqaruv jarayonlariga ilg‘or amaliyotlarni bosqichma-bosqich joriy etish istiqbollari yuzasidan mulohazalar bildirildi. Jumladan, Farg‘ona viloyati va Toshkent shahridagi ko‘p tarmoqli shifoxonalar faoliyatini yanada rivojlantirishga doir yondashuvlar muhokama mavzularidan biri bo‘ldi.
Shuningdek, tomonlar O‘zbekistonda tibbiy turizm salohiyatini bosqichma-bosqich rivojlantirish masalalariga to‘xtaldi. Xususan, Toshkent shahri, Surxondaryo, Samarqand, Farg‘ona va Xorazm viloyatlarida mavjud imkoniyatlardan samarali foydalanish, xizmatlar sifati va infratuzilmani takomillashtirish, shuningdek, xalqaro tajribani o‘rganish yo‘nalishlarida hamkorlikni kengaytirish istiqbollari ko‘rib chiqildi.
Tomonlar sog‘liqni saqlash sohasida o‘zaro hamkorlikni amaliy jihatdan boyitish, soha mutaxassislari o‘rtasida muloqotni kuchaytirish hamda aholiga ko‘rsatilayotgan tibbiy xizmatlar sifatini izchil oshirish muhimligini ta’kidladilar.
Iqtisodiyot va moliya vazirligi
Axborot xizmati va kommunikatsiyalar boshqarmasi