O‘zbekiston Respublikasi Iqtisodiyot va moliya vazirligi

Mazkur strategiya doirasida hozirgi kunda davlat moliyasini boshqarish sohasini takomillashtirish, jumladan byudjet mablag‘laridan samarali foydalanish, ularning hisobini to‘g‘ri yuritilishini ta’minlash hamda shaffoflikni oshirish borasida turli darajadagi xalqaro tashkilotlar bilan hamkorlik yo‘lga qo‘yilgan.

Mazkur islohotlar doirasida, joriy yilning 27–30-yanvar kunlari Xalqaro valyuta jamg‘armasining mustaqil ekspertlari Imran Aziz va Gerhard Steger boshchiligida vazirlik markaziy apparati mutaxassilarining budjet sohasidagi bilim va ko‘nikmalarini oshirish maqsadida “Budjet so‘rovlarini ko‘rib chiqish” mavzusida o‘quv-amaliy seminari tashkil etilishi rejalashtirilgan.

Ma’lumot uchun, ushbu seminar davomida budjet tizimi budjetlarini shakllantirish jarayonlari tahlili, xususan xarajat turlari (joriy, kapital va ma’muriy xarajatlar) bo‘yicha budjet so‘rovlarini (sog‘liqni saqlash va ta’lim sohasiga ustuvorlikni qaratgan holda) ko‘rib chiqish va baholashning umumiy yondashuvlari, shuningdek, baholash uchun foydalaniladigan vositalar va usullar, ularning tasdiqlangan xarajatlarning cheklangan miqdorlariga muvofiqligini ta’minlash yuzasidan muhokamalar va amaliy mashg‘ulotlar o‘tkazish ko‘zda tutilgan.

Bugun 27-yanvar kuni mazkur amaliy seminar boshlandi. Unda Iqtisodiyot va moliya vazirligining 40 ga yaqin xodimlari ishtirok etib, XVJning ekspertlari bilan budjet so‘rovlarini ko‘rib chiqish va tahlil qilish va unda Iqtisodiyot va moliya vazirligining roli yuzasidan fikrlar almashildi.

Shuningdek, ekspertlar tomonidan O‘zbekistonda budjet so‘rovlarining joriy holati hamda ularning budjet mablag‘larini rejalashtirish va taqsimlash sifatini yaxshilashdagi ahamiyatini oshirish bo‘yicha  taqdimotlar o‘tkazildi.

Seminar yakunida erishilgan natijalar va muhokamalarning tafsilotlari yuzasidan qo‘shimcha axborot taqdim etiladi.

Iqtisodiyot va moliya vazirligi

Axborot xizmati va kommunikatsiyalar boshqarmasi