Buxoroda “Ishonch” jamg‘armasi mablag‘lari hisobidan raqamli va inklyuziv ta’limni rivojlantirish loyihalari natijalariga bag‘ishlangan matbuot anjumani hamda press-tur o‘tkazildi
2025-12-17 09:25:00 / Vazirlik yangiliklari
Eslatib o‘tamiz, bugungi kunga qadar “Ishonch” jamg‘armasi mablag‘lari hisobidan sog‘liqni saqlash (onalar va bolalar salomatligini muhofaza qilish) hamda ta’lim (AKT, inklyuziv ta’lim, maktablarning sanitariya-gigiyena holatini yaxshilash va isitish tizimini modernizatsiya qilish) sohalarida umumiy qiymati 87 mln dollarlik loyihalar ishga tushirilgan.
Mazkur press-tur doirasida Romitan tumanidagi 1-umumta’lim maktabi, Buxoro shahridagi 45-maktab hamda viloyat Pedagogik mahorat markazida o‘quvchi va o‘qituvchilar uchun yaratilgan shart-sharoitlar o‘rganildi.
Tadbir davomida delegatsiya a’zolariga Pedagogik mahorat markazi faoliyati, xususan, raqamli ta’lim va STEM muhiti hamda darslarda zamonaviy texnologiyalarni tatbiq etish bo‘yicha o‘qituvchilar uchun tashkil etilgan kaskad-treninglar namoyish etildi.
Tadbirning kirish qismida Buxoro viloyati hokimi Botir Zaripov, “Ishonch” jamg‘armasi boshqaruv qo‘mitasi vakillari, Maktabgacha va maktab ta’limi vaziri o‘rinbosari Azizbek Turg‘unboyev hamda Buxoro viloyati Pedagogik mahorat markazi direktori so‘zga chiqib, loyiha doirasida bajarilgan ishlar va uning ta’lim sifatiga ta’siriga to‘xtalib o‘tdilar.
Tashrif yakunida OAV hamda jamoatchilik vakillari ishtirokida matbuot anjumani bo‘lib o‘tdi. Unda Iqtisodiyot va moliya vaziri o‘rinbosari Otabek Fazilkarimov, Shveysariyaning O‘zbekistondagi elchisi Konstantin Obolenskiy hamda BMTning O‘zbekistondagi doimiy koordinatori Sabine Mahl ishtirok etib, jurnalistlar va fuqarolik jamiyati vakillarining savollariga javob berdilar.
Shuningdek, matbuot anjumanidan so‘ng “Ishonch” jamg‘armasi boshqaruv qo‘mitasi navbatdagi transh mablag‘lari hisobidan amalga oshiriladigan loyihalar yo‘nalishlarini muhokama qildi.
Mazkur tashrif “Ishonch” jamg‘armasi boshqaruv qo‘mitasi tashabbusi bilan amalga oshirilib, u loyiha doirasidagi islohotlarning amaldagi natijalarini namoyish qilishda o‘ziga xos platforma bo‘lib xizmat qildi hamda qaytarilgan mablag‘lar O‘zbeksiton xalqi manfaatlari yo‘lida ishlatilayotganini yana bir bor tasdiqladi.
Iqtisodiyot va moliya vazirligi
Axborot xizmati va kommunikatsiyalar boshqarmasi