O‘zbekiston Respublikasi Iqtisodiyot va moliya vazirligi

Loyiha orqali Qoraqalpog‘iston Respublikasi, Xorazm, Buxoro va Navoiy viloyatlarining 20 ta tumanidagi 170 ta MFYdagi dolzarb masalalar qamrab olinishi belgilangan. Jumladan, uning 1-bosqichi orqali 2024-2025-yillarda 111 ta yangi ijtimoiy soha obyektlarining yangidan qurilishi davom etmoqda. Hududlarda barpo etilayotgan umumta’lim maktablari, davlat maktabgacha ta’im tashkilotlari, oilaviy shifokorlik poliklinikalari kabi yangi ijtimoiy soha obyektlari hamda aholi tadbirkorligini oshirishga qaratilgan mahalla maishiy xizmat ko‘rsatish markazlari orqali olis mahallalarda istiqomat qilayotgan aholi turmush sharoiti yaxshilanmoqda.

Loyihaning 2-bosqichi rekonstruksiya va mukammal ta’mirlash, ijtimoiy soha obyektlariga qo‘shimcha binolar qurish kabi ishlariga oid umumiy hisobda 801 ta subloyihalar bajariladi. Ayni kunlarda 1-bosqichdagi yangi qurilish obyektlarining aksariyatida qurilish ishlari yakunlangan bo‘lib, 2-bosqichdagi infratuzilma-muhandislik ishlari boshlab yuborilgan.

Xususan, Xorazm vilotining Urganch, Xonqa va Hazorasp tumanlari, Qoraqalpog‘iston Respublikasining Beruniy, To‘rtko‘l, Ellikqal’a tumanlaridagi mahallalarda pudratchi tashkilotlar tomonidan ichki yo‘llarni asfallash, yo‘l chetlarida piyodalar yo‘laklarini qurish, ko‘chalarda yoritish chiroqlarini o‘rnatish, elektr transformatorlarini yangilash, irrigatsiya obyektlari hamda maktablar uchun qo‘shimcha binolar barpo etish kabi ishlar olib borilmoqda.

Birgina Xorazm viloyatida loyiha natijasida 21 ta umumtaʼlim maktablari, 14 ta davlat maktabgacha taʼlim muassasalari, 7 ta oilaviy shifokorlik punktlar, 55 ta asosiy va ichki yoʻllar, 23 ta ichimlik suv tarmoqlari, 43 ta elektr taʼminoti tizimi, 14 ta sugʻorish va irrigatsiya inshootlari, 31 ta piyodalar yoʻlagi va tungi koʻcha yoritish tizimlari hamda 12 ta mahalla maishiy xizmat koʻrsatish markazlarini yangidan qurish, mukammal taʼmirlash va rekonstruksiya qilish kabi ishlar amalga oshiriladi.

Ko‘chalarda ichimlik suvi tarmoqlari tortilib, yo‘llar asfaltlanishi mahalliy aholining yillar davomida intiqlik bilan kutgan o‘zgarishlaridan. Elektr ta’minotining yaxshilanishi esa kuz-qish mavsumida ularning og‘irini yengil qilishi shubhasiz. Shuningdek, yo‘l chetida trotuarlar yangilanib, ko‘cha yoritish chiroqlari o‘rnatilishi aholi uchun qulay va xavfsiz muhit yaratishga xizmat qilmoqda.

“Qishloq joylarni barqaror rivojlantirish” loyihasi doirasida irrigatsiya tizimlarini modernizatsiya qilish ishlari ham amalga oshirilmoqda. Bu tadbirlar dehqon va fermer xo‘jaliklarining hosildorligini oshirishga va suv resurslaridan samarali foydalanish imkonini yaratadi.

Loyiha doirasidagi ushbu ishlar mamlakatimizda qishloq joylarni har tomonlama rivojlantirish, aholi uchun munosib turmush sharoitini yaratish orqali ularni rozi qilish va barqaror iqtisodiy o‘sishni ta’minlash maqsadlariga xizmat qilmoqda.