“Korrupsiyaviy xavf-xatarlarning oldini olish va manfaatlar toʻqnashuvini bartaraf etish” mavzusida seminar-trening tashkil etildi
2025-11-11 17:35:00 / Vazirlik yangiliklari
Ushbu seminar-treningda Iqtisodiyot va moliya vazirligi Korrupsiyaga qarshi kurashish va komplayens nazorati boʻlimi yetakchi mutaxassisi Muhammad Abdurazzoqov, Davlat xaridlari siyosati departamenti bosh mutaxassisi Dilfuza Uraqova va Oʻquv markazi katta oʻqituvchisi Sanjar Boltayev tomonidan “Korrupsiyaga qarshi kurashish toʻgʻrisida” va “Manfaatlar toʻqnashuvi toʻgʻrisida”gi Qonunlarning mazmun mohiyati, “Davlat xaridlari milliy va xalqaro tajriba, amaliyotdagi muammolar”, “Davlat xaridlari sohasida korrupsion holatlarni oldini olish va bartaraf etish” mavzularida taqdimotlar oʻtkazildi.
Mazkur seminar-treningda Iqtisodiyot va moliya vazirligi markaziy apparati hamda vazirlik tasarrufidagi tashkilotlarda korrupsiyaviy xavf-xatarga moyil boʻlgan funksiyalarni amalga oshiruvchi lavozimlarda mehnat (xizmat) faoliyatini olib boruvchi xodimlar ishtirok etdi.
Seminar davomida ishtirokchilarga soʻnggi yillarda korrupsiyaga qarshi kurashish va manfaatlar toʻqnashuvini boshqarish borasida olib borilayotgan ishlar, davlat xizmatchilari faoliyatida manfaatlar toʻqnashuvini oldini olish boʻyicha cheklovlar hamda davlat xaridlarida korrupsiya va manfaatlar toʻqnashuvini oldini olish haqida batafsil tushuntirish berildi.
Shuningdek, seminar davomida korrupsiya va manfaatlar toʻqnashuvining salbiy oqibatlari haqida tayyorlangan videorolik namoyish etildi.
Seminar-trening savol-javob shaklida tashkil etilib, ishtirokchilar oʻzlari qiziqtirgan savollarga batafsil javob oldi.
Iqtisodiyot va moliya vazirligi
Axborot xizmati