O‘zbekiston Respublikasi Adliya vazirligi

Adliya vaziri o‘rinbosari N. Muxammadiyev Koreya xalqaro hamkorlik agentligi (KOICA) ekspertlaridan iborat delegatsiya bilan uchrashuv o‘tkazdi.

N. Muxammadiyev mazkur uchrashuvda KOICA agentligi bilan hamkorlikda amalga oshirilayotgan “Sun’iy intellektga asoslangan yuridik xizmat muhitini yaratish va Koreya – O‘zbekiston huquq markazini tashkil etish” loyihasini (qiymati 14,5 mln AQSH dollari) O‘zbekiston huquq tizimi tarixidagi strategik tashabbuslardan biri ekanligini qayd etdi.

Ma’lumot uchun: Mazkur loyiha nafaqat zamonaviy raqamli yuridik infratuzilmani, balki sun’iy intellekt texnologiyalariga asoslangan yuridik xizmatlarni rivojlantirishni, aholiga qulay va tezkor huquqiy yordam ko‘rsatish tizimini yo‘lga qo‘yishga yo‘naltirilgan.

Uchrashuvda Koreya xalqaro hamkorlik agentligi (KOICA) ekspertlari bilan quyidagi masalalar:

▪️Sun’iy intellekt va axborot texnologiyalarni huquqiy tartibga solish holati;
▪️normativ-huquqiy hujjatlarni ishlab chiqishda sun’iy intellektdan foydalanish holati;
▪️mamlakatimizda huquqiy axborotni aholiga yetkazish, ushbu sohani raqamlashtirish, jumladan, Lex.uz qonunchilik ma’lumotlari milliy bazasi imkoniyatlari;
▪️Axborot texnologiyalarni huquqiy tartibga solish hamda qonun ijodkorligi faoliyatida sun’iy intellekt va axborot texnologiyalarni qo‘llash sohasidagi mutaxassislar hamda maxsus jihozlarga bo‘lgan ehtiyojlar muhokama qilindi.

Uchrashuv yakunida mazkur loyiha doirasida tashkil etilishi rejalashtirilayotgan Koreya – O‘zbekiston huquq markazi ikki davlat o‘rtasida huquqiy bilim va tajriba almashinuvi markaziga aylanishi hamda ushbu markaz Adliya vazirligi, Toshkent davlat yuridik universiteti va Koreya hamkor tashkilotlari o‘rtasidagi uzviy aloqalarni mustahkamlab, yangi ta’lim dasturlari, qo‘shma tadqiqotlar, seminar va konferensiyalar uchun keng imkoniyatlar yaratishi alohida ta’kidlandi.