Nizolarni muqobil hal etish: Xalqaro mediatsiyani rivojlantirish sohasida Adliya vazirligi Osiyo taraqqiyot banki institutining konferensiyasida ishtirok etdi.
2025-02-21 15:00:00 / Vazirlik yangiliklari
Adliya vazirligi vakillari 2025-yil 18-19-fevral kunlari Tokio shahrida o‘tkazilgan “Nizolarni muqobil hal etish: Osiyo va Tinch okeani mintaqasida xalqaro mediatsiyani rivojlantirish” mavzusidagi xalqaro konferensiyada ishtirok etdilar. Tadbirda dunyoning turli burchaklaridan kelgan yuridik mutaxassislar, mediatorlar, arbitrlar va davlat vakillari ishtirok etib, mediatsiya va arbitraj sohasidagi so‘nggi tendensiyalar, global amaliy yondoshuvlar va muammolarni muhokama qildilar.
Ma’lumot uchun: Konferensiya Osiyo taraqqiyot banki (OTB), OTB instituti, BMTning Xalqaro savdo huquqi bo‘yicha komissiyasi va Yaponiya Adliya vazirligi hamkorligida tashkil etilgan.
Konferensiya davomida ishtirokchilar nizolarni hal etishning muqobil usullari hisoblangan mediatsiya va arbitrajning samaradorligi haqida atroflicha fikr almashdilar. Xususan, Mediatsiya bo‘yicha Singapur konvensiyasi, BMTning Xalqaro savdo huquqi bo‘yicha komissiyasining (UNCITRAL) Xalqaro tijorat mediatsiya to‘g‘risidagi namunaviy qonuni hamda turli xil davlat vakillari o‘z tizimlarida mediatsiyaning tashkiliy-huquqiy tizimi to‘g‘risida ma’lumotlar bilan o‘rtoqlashdilar.
Tadbirda ishtirok etgan Adliya vazirligi vakillari, O‘zbekistonda mediatsiya va arbitraj sohasida amalga oshirilgan islohotlar to‘g‘risida ma’lumot berib, O‘zbekistonning ushbu sohada hamkorlikni mustahkamlash borasidagi intilishlarini ta’kidlab o‘tdilar.
Konferensiya tashkilotchilari va ishtirokchilar tomonidan kelgusida bunday tadbirlarning davom ettirilishi va bu sohada global hamkorlikni rivojlantirishga alohida e’tibor qaratilishi ta’kidlandi.