O‘zbekiston Respublikasi Adliya vazirligi

Adliya vaziri A. Tashkulov Samarqand viloyati adliya boshqarmasida bo‘lib, hududda amalga oshirilayotgan ishlar hamda erishilayotgan natijalar bilan yaqindan tanishdi.

Jarayon davomida boshqarmaning joriy faoliyati atroflicha ko‘rib chiqildi. Xususan, boshqarma o‘rinbosarlari tomonidan yo‘nalishlar kesimida tayyorlangan taqdimotlar eshitilib, har bir sohada amalga oshirilayotgan ishlar, mavjud muammolar va ularni bartaraf etish choralari muhokama qilindi.

Davlat xizmatlarini ko‘rsatishda aholiga qulaylik yaratish, byurokratik to‘siqlarni qisqartirish hamda xizmatlar sifatini oshirish masalalariga alohida e’tibor qaratildi.

Shu bilan birga, intellektual mulk sohasini rivojlantirish, mualliflik huquqlarini himoya qilish, yuridik xizmatlar ko‘lamini kengaytirish hamda notariat tizimini yanada takomillashtirish yo‘nalishlarida olib borilayotgan ishlar tahlil qilindi.

Yakunda faoliyat samaradorligini oshirish, shaxsiy mas’uliyatni kuchaytirish, kasb etikasi va odob-axloq qoidalariga qat’iy rioya etish, shuningdek fuqarolar bilan samarali muloqotni yo‘lga qo‘yish yuzasidan tegishli ko‘rsatmalar berildi.