Yuridik xizmat: muammo va takliflar
2024-06-15 10:05:00 / Vazirlik yangiliklari
Adliya vaziri oʻrinbosari M.Ikramov Samarqandda yuridik xizmat koʻrsatiladigan tashkilotlar vakillari bilan uchrashdi. Davra suhbatida yuridik xizmat koʻrsatish markazlarining bugungi faoliyati, sohani yanada takomillashtirishga doir taklif-mulohazalar tinglandi, mavjud muammolar oʻrtaga tashlandi.
Jumladan, Yoshlar ishlari agentligi Samarqand viloyat boshqarmasi inson resurslari boʻyicha masʼul xodimi tugʻish taʼtiliga chiqqan xodim oʻrniga vaqtincha xodim olish tartibini yuridik jihatdan rasmiylashtirishni soddalashtirish, Samarqand tuman tibbiyot birlashmasi masʼul xodimi E-huquqshunos va hrm.argos.uz tizimlarini bir-biriga integratsiya qilish taklifini bildirdi.
Maʼlumki, viloyat tashkilotlariga “E-huquqshunos” elektron tizimi orqali xizmat koʻrsatib kelinadi. 2024-yil 5 oy davomida ushbu tizim orqali yuridik xizmat koʻrsatilayotgan tashkilotlar tomonidan 238 711 ta yuridik tusdagi hujjatlar loyihalari kelib tushgan boʻlib, shundan 215 769 tasiga markaz tomonidan ijobiy, 5 128 tasiga salbiy xulosalar berilgan. 17 814 ta hujjat loyihasidagi kamchiliklarni bartaraf etish uchun ijobiy xulosa berish rad etilgan.
Markazlar tomonidan mazkur davrda xizmat koʻrsatilayotgan tashkilotlar manfaatini koʻzlab jami 94 ta talabnomalar tayyorlab berilgan va ularning barchasi qanoatlantirilgan.