Yashnobod tumanida xavfsiz muhitni shakllantirish bo‘yicha amalga oshirilayotgan ishlar taqdimoti o‘tkazildi
2026-02-20 11:00:00 / Vazirlik yangiliklari
O‘zbekiston Respublikasi Prezidentining tegishli qarori ijrosi doirasida Yashnobod tumanida xavfsiz muhitni shakllantirish hamda huquqbuzarliklar profilaktikasi samaradorligini oshirish yo‘nalishida amalga oshirilayotgan ishlar yuzasidan taqdimot o‘tkazildi.
Taqdimot jarayonida jinoyatchilikning kelib chiqish sabablari va omillarini ilmiy asosda o‘rganish, ularni barvaqt aniqlash hamda manzilli choralar ko‘rish masalalariga alohida e’tibor qaratildi. Xususan, Toshkent davlat yuridik universiteti tomonidan jinoyatchilik holatlari ilmiy jihatdan tahlil qilinib, amaliy tavsiyalar va takliflar ishlab chiqilayotgani ta’kidlandi.
Shuningdek, yig‘ilishda mahallalarda huquqbuzarliklarning oldini olish tizimini yanada takomillashtirish maqsadida “mahalla yettiligi” a’zolarining vazifa va funksiyalarini optimallashtirish bo‘yicha mutasaddilar tomonidan ilgari surilgan takliflar ko‘rib chiqildi.
Mazkur yondashuv hududlarda profilaktika ishlarini yanada samarali tashkil etishga xizmat qilishi qayd etildi.