Iqtisodiyot va moliya vazirligi hamda Global ekologik jamg‘armasining (GEF) Kichik grantlar dasturi (SGP) hamkorligida issiqlik nasoslarini joriy etish ishlari olib borilmoqda
2024-12-18 20:05:00 / Vazirlik yangiliklari
O‘rganishda Sirdaryo viloyati hokimining birinchi o‘rinbosari Abdurahim Umarov, Boyovut tumani hokimining birinchi o‘rinbosari O‘tkir Sariboyev, Iqtisodiyot va moliya vazirligi Yashil iqtisodiyotga o‘tish va rivojlantirishni muvofiqlashtirish boshqarmasi boshlig‘i Shoxzod Islamov, Global ekologik jamg‘armasi Kichik grantlar dasturining O‘zbekistondagi milliy koordinatori Aleksey Volkov hamda Boyovut tumani 19-son umumiy o‘rta taʼlim maktabi direktori Muxtaram Hasanova ishtirok etdi.
Mazkur loyiha Iqtisodiyot va moliya vazirligi Global ekologik jamg‘armasining (GEF) Kichik grantlar dasturi (SGP) bilan birgalikda amalga oshirilmoqda. Loyiha doirasida maktabda ekologik va toza texnologiyalarni joriy etish orqali kuz-qish mavsumida maktabning 20 dan ortiq o‘quv xonalari doimiy isitish tizimi bilan ta’minlanmoqda.
Loyiha natijasida, maktabni isitish jarayoniga 16,5 baravar kamroq vaqt sarflandi, o‘rnatilgan 2 ta issiqlik nasoslari kunlik 1437 kVt*s elektr energiya ishlatildi, 38 tonna ko‘mir yoqilishi va zararli moddalar havoga tashlanishi oldi olindi, shuningdek, xonalarning issiqlik bo‘yicha sanitar normasi bajarildi.
Ushbu sinov loyiha natijalaridan kelib chiqib, shuningdek, ijtimoiy soha obyektlarini toza energiya resurslari bilan taʼminlash orqali tabiat resurslarni saqlash, tabiatga zarar yetkazmaslik va aholi salomatligini saqlash, sog‘lom turmush tarzini taʼminlash maqsadida kelgusida boshqa ijtimoiy soha obyektlarida ham issiqlik nasoslaridan foydalanishni kengaytirish rejalashtirilmoqda.
Iqtisodiyot va moliya vazirligi
Axborot xizmati