ИКАО Ўзбекистоннинг фуқаро авиациясини ривожлантириш йўналишидаги саъйи ҳаракатларни юқори баҳолади
2025-09-30 16:00:00 / Янгиликлар
Учрашувда ИКАО Бош котиби Хуан Карлос Салазар Ўзбекистон Ҳукумати томонидан фуқаро авиациясини ривожлантириш йўналишида амалга оширилаётган саъйи ҳаракатларни юқори баҳолади.
Мазкур саъй-ҳаракатлар ҳаво транспортининг мамлакат иқтисодий ривожланишидаги ўрни ва аҳамиятини, қолаверса, Ўзбекистоннинг USOAP/USAP аудитларидан муваффақиятли ўтгани буни аниқ ифодаси эканлиги таъкидланди.
Учрашувда томонлар Ўзбекистонда фуқаро авиациясини ривожлантиришнинг қуйидаги устувор йўналишларини муҳокама этишди:
- ИКАО стандартлари ва тавсия этилган амалиёти (SARPs) бажарилишининг жорий ҳолати;
- авиация инфратузилмасини модернизация қилиш бўйича устувор ташаббуслар;
- ИКАОнинг Ўзбекистонда бўлиб ўтадиган келгуси аудитларига (ICVM ва USOAP) тайёргарлик жараёнлари.
Шу билан бирга, Ўзбекистон ва ИКАО ўртасида имзоланган 2024–2026 йилларга мўлжалланган “Ўзбекистон Республикасида парвозлар хавфсизлиги даражасини ошириш бўйича Стратегик ҳаракатлар режаси” (COSPA) ижросига алоҳида эътибор қаратилди.
“Ўзавиатсия” агентлиги директори Т.А. Назаров Ўзбекистон фуқаро авиациясини институционал ривожлантириш, хусусан, ИКАОнинг халқаро дастурлари доирасида экспертлик ва техник ёрдам кўрсатиш масаласидаги қўллаб-қувватлови учун ИКАОга самимий миннатдорчилик билдирди.
ИКАО Бош котиби Хуан Карлос Салазар Ўзбекистон Республикаси фуқаро авиацияси соҳасида ислоҳотларни амалга оширишда ИКАО билан ҳамкорлик янада ривожланишига умид билдирди.