Кибержиноятчиликка қарши курашиш долзарб вазифа
2025-09-24 16:00:00 / Янгиликлар
Киберхавфсизлик соҳаси бўйича билимларни ошириш, фойдаланувчиларнинг хабардорлигини кучайтириш ва махсус тренинглар ўтказиш кибержиноятларга қарши самарали курашишнинг муҳим омилларидан биридир.
Айни шу мақсадда Тошкент шаҳар ИИБ ва Тошкент шаҳар прокуратураси билан ҳамкорликда Фирибгарлик, коррупция ва киберхавфсизлик жиноятлари келиб чиқиши ва уни олдини олиш юзасидан транспорт вазирлиги марказий аппарати ҳамда ҳудудий бошқармалари ходимлари иштирокида ўқув семинари ташкил этилди.
Учрашувда мутахассислар кибержиноятларга қарши кураш фақат технологик ҳимоя билан чекланмай, балки фойдаланувчиларнинг онгли ва эҳтиёткор бўлишини ҳам талаб этиши алоҳида таъкидлаб ўтилди.
Кучли пароллар ишлатиш, икки босқичли аутентификация, антивирус дастурларидан фойдаланиш каби чораларга риоя қилиш орқали хавфсизликни таъминлаш мумкин. Шунингдек, ҳар бир инсон интернетдан фойдаланганда эҳтиёткорлик билан ҳаракат қилиши, шубҳали ҳаволалардан сақланиши ва шахсий маълумотларини ҳимоя қилиши зарурлиги айтиб ўтилди.
Зеро, келажакда технологик тараққиёт билан бирга кибержиноятлар ҳам янада ривожланиши мумкин, шунинг учун ҳар бир инсон ва ташкилот ўз хавфсизлигини таъминлашга доимий равишда эътибор қаратиши лозим.
Иштирокчиларга кибержиноятлар билан самарали курашиш учун ҳам технологик, ҳам ҳуқуқий жиҳатдан ҳаракат қилиш зарур эканлиги, ҳар бир фойдаланувчи ўзининг ахборот хавфсизлигига масъулият билан ёндашиши лозимлиги тушунтирилди.