“Беларусь – Россия – Қозоғистон – Ўзбекистон –Афғонистон – Покистон” халқаро транспорт йўлагини ривожлантириш бўйича ишчи гуруҳи йиғилиши бўлиб ўтди
2025-05-23 13:00:00 / Янгиликлар
Ўзбекистон Республикаси транспорт вазирлиги томонидан ташкиллаштирилган онлайн учрашувда Покистон вакиллари ҳам йўналиш иштирокчилари сифатида расмий равишда қатнашди.
Учрашувда томонлар Термиз шаҳрида қабул қилинган Йўл харитасининг ижро ҳолатини муҳокама қилдилар. Ўзбекистон томони “Ўзбекистон – Афғонистон – Покистон” орқали юк ташиш ҳажми сезиларли даражада ошганини қайд этди.
2024 йил якунига кўра “Трансафғон” йўналишида юк ташишлар ҳажми 5 миллион тоннадан ошгани, жумладан хорижий давлатлардан Ўзбекистон орқали Афғонистонга йўналтирилган транзит ҳажми 3 миллион тоннадан ошгани қайд этилди.
Бундан ташқари, Трансафғон йўналиши бўйича умумий ташилган юклар ҳажмидан Ўзбекистон орқали Афғонистон ва Покистонга транзит сифатида Қирғизистон, Тожикистон, Грузия, Нидерландия, Туркия, Хитой ва Саудия Арабистони каби мамлакатларга/дан 500 минг тоннага яқин юк ташилган.
Томонлар Афғонистон томонининг йўлакка унинг ажралмас қисми сифатида қўшилиши муҳимлигини таъкидладилар. Учрашув якунида Ишчи гуруҳ аъзолари иштирокчи мамлакатларнинг темир йўл маъмуриятлари иштирокида офлайн учрашув ўтказиш бўйича келишувга эришдилар.