Тошкентда Транскаспий транспорт коридорини мувофиқлаштириш платформаси доирасида хусусий сектор иштирокида давра суҳбати ўтказилди
2025-05-23 12:00:00 / Янгиликлар
Тадбирнинг асосий мақсади Транскаспий транспорт коридори орқали юк ташишлар ҳажмини ошириш ва юзага келаётган тўсиқларни аниқлашда хусусий сектор вакиллари фикрини эшитишдан иборат.
Тадбирни Европа Комиссиясининг Осиё ва Тинч океани бўйича директори Петерис Устубс жаноблари очиб берди ва Транскаспий транспорт йўлагининг жорий ҳолати ҳамда ривожлантириш бўйича амалга оширилган ишлар тўғрисида тўхталиб ўтди.
Тадбирнинг асосий маърузачиларидан бири Транспорт муаммоларини ўрганиш маркази директори Бекзод Холматов Қизил денгиз ҳамда шарқий Европадаги нотинч геосиёсий вазият “Европа-Хитой” ва “Европа-Марказий Осиё” йўналишида хавфсиз, барқарор ва ўзаро манфаатли транспорт йўлакларини ривожлантириш зарурати юзага келаётгани ва ушбу геосиёсий ўзгаришлар фонида Транскаспий халқаро мультимодал транспорт йўлаги жаҳон ҳамжамиятининг диққат марказида бўлаётгани ҳақида сўзлади.
Тадбир давомида Транскаспий йўлаги орқали юк ташишлар амалга ошираётган миллий транспорт-логистика корхоналари вакиллари йўналишнинг истиқболлари ва мавжуд муаммолар тўғрисида батафсил тўхталиб ўтди.
Каспий денгизи портлари ўтказувчанлик қобилияти пастлиги туфайли юзага келаётган навбатлар натижасида етказиб бериш муддатлари 2-3 баробарга ошаётгани таъкидланди ва мазкур муаммони бартараф этиш мақсадида портларнинг инфратузилмавий ҳолатини яхшилаш учун йирик инвестициялар жалб этиш зарурлиги қайд этилди.
Тадбирнинг дастлабки сессиясида Ўзбекистондаги мультимодал логистика марказлари ва омборлари тўғрисида Европа Иттифоқининг транспорт маслаҳатчиси маърузаси тингланди ва мамлакатимизнинг инфратузилмавий ҳолатидан унумли фойдаланиш бўйича ўз фикрларини билдирди.
Тадбир якунида Европа Комиссияси вакиллари учрашувнинг юқори савияда ўтганини таъкидлаб, билдирилган таклифлар ижросини муҳокама қилиш мақсадида мазкур форматдаги дастлабки учрашувни жорий йилнинг ноябрь ойида ўтказиш таклифини билдирди.