Ўзбекистон Республикаси Транспорт вазирлиги

Учрашувда мамлакатимиз темир йўл тизимини ривожлантириш йўналишида мазкур компания билан темир йўл технологиялари ва инновациялари соҳасидаги ҳамкорлигини чуқурлаштириш масалалари муҳокама этилди.

Хусусан, юқори тезликда ҳаракатланувчи поездлар  хавфсизлигини таъминлашда муҳим ўрин тутувчи сигнал тизимлари, геойўналишни аниқловчи ва темир йўл бошқарув тизимлари ҳамда  Корея навигация технологияларини республикамиз ҳудудида янги лойиҳалаштирилаётган темир йўл лойиҳаларида татбиқ этиш юзасидан фикр алмашилди.

Шунингдек, учрашув давомида Korea National Railway компанияси бош директори Ли Сеонг Хай “Тошкент – Самарқанд” йўналишида юқори тезликдаги алоҳида йўловчи ташиш темир йўлини қуриш лойиҳасининг ТИАсини ишлаб чиқиш жараёнининг жорий ҳолати  бўйича маълумот бериб ўтди. 

Эслатиб ўтамиз, Ўзбекистон Республикаси Президентининг 2023 йил 10 октябрдаги “Ўзбекистон Республикаси темир йўл транспорти соҳасини тубдан ислоҳ қилиш чора-тадбирлари тўғрисида” ПҚ-329-сон қарорида  “Тошкент – Самарқанд” йўналишида юқори тезликдаги алоҳида йўловчи ташиш темир йўлини қуриш лойиҳасининг техник-иқтисодий асосларини ишлаб чиқиш вазифаси берилган. 

Мазкур лойиҳанинг техник-иқтисодий асосларини “Korea Eximbank”нинг грант маблағлари ҳисобидан “Saman Engineering”,  “Dong Myeong Engineering Consultants & Architecture Co., Ltd”,  “Korea Railroad Corporation” ва “Korea National Railway” компаниялари консорциуми томонидан ишлаб чиқиш бўйича келишувга эришилган. 

Жорий йилнинг 14 февраль куни Корея компаниялари консорциуми иштирокида бўлиб ўтган йиғилишда мазкур лойиҳанинг техник-иқтисодий асосларини ишлаб чиқишнинг амалий босқичига ўтиш учун асос бўлган тегишли ҳужжатлар имзоланган эди.