Маҳаллий экспедиторлик ташкилотлари билан ҳамкорликда Маслаҳат кенгаши ташкил этилди
2025-04-25 15:00:00 / Янгиликлар
Эслатиб ўтамиз, Ўзбекистон Республикаси Президентининг 2025 йил 27 февралдаги ПҚ–78-сон қарорида маҳаллий экспедиторлик ташкилотлари билан маслаҳат кенгашини ташкил қилган ҳолда уларнинг халқаро ташишдаги улушини 2025 йилда 25 фоизга, 2026 йил 50 фоизгача олиб чиқиш бўйича комплекс чора-тадбирлар режасини ишлаб чиқиш ва қабул қилиш топшириғи берилган эди.
Транспорт вазирининг биринчи ўринбосари Маманбий Омаров раислигида бўлиб ўтган йиғилишда вазирлик томонидан ишлаб чиқилган халқаро ташишларда маҳаллий транспорт-экспедиторлик ташкилотларини қўллаб-қувватлаш ва уларнинг улушини ошириш бўйича комплекс чора-тадбирлар режаси лойиҳаси маслаҳат кенгаши аъзолари иштирокида муҳокама этилди.
Маҳаллий транспорт-экспедиторлик ташкилотлари фаолиятини амалга оширишда замонавий ёндашувлар ва тизимларни инобатга олган ҳолда амалдаги норматив-ҳуқуқий ҳужжатларни қайта кўриб чиқиш мазкур лойиҳанинг асосий йўналишларидан биридир.
Учрашувда Маслаҳат кенгаши аъзолари транспорт соҳасида давлат ва хусусий сектор ўртасидаги самарали ҳамкорликни ривожлантириш масалалари, соҳадаги мавжуд муаммолар ва уларнинг ечими юзасидан ўз таклиф ва мулоҳазаларини билдиришди.