“Ташаббусли бюджет” даги ҳар бир объект назоратга олинди
2024-08-12 13:50:00 / Янгиликлар
Транспорт назорати инспекцияси бошлиғи Жамшид Каримов бошчилигида Тошкент вилоятида “Ташаббусли бюджет” лойиҳасида иштирок этиб, ғолибликни қўлга киритган ташаббускорлар, маҳалла фуқаролар йиғини раислари, буюртмачи ва пудратчилар иштирокида кенгайтирилган йиғилиш бўлиб ўтди.
Очиқ давра суҳбати тарзида ташкил этилган тадбирда ҳар бир объектнинг лойиҳасидан бошлаб, қурилиши, сифат назорати, қабул қилиш тартибигача муҳокама қилинди.
Жорий йил Тошкент вилояти бўйича 19 та туман шаҳардаги, 95 та МФЙда жами 102 та объектда “Ташаббусли бюджет” лойиҳаси асосида йўл қурилиши ишлари амалга оширилади. Бунда 271,4 км узунликдаги қурилиш ишлари учун 132,26 млрд сўм маблағ ажратилган. Ҳар бир объект Транспорт назорати инспекциясининг “Йўл-сифат назорат” тизимида рўйхатга олинди ва 27 объектда қурилиш ишлари бошланди.
Инспекторлар ҳар бир объектнинг лойиҳа ҳужжатлари ишлаб чиқилишидан бошлаб, қурилиш жараёнидан фойдаланишга топширилгунга қадар амалдаги қонунчилик талабларига асосан доимий давлат назоратини амалга оширади.
Қурилиш жараёнларида лойиҳа ҳужжатларида белгиланган ишларни этарлича бажармаслик, ёки сусткашликка йўл қуйилганда ташаббускорлар, маҳалла фаоллари Транспорт назорати инспекцияси марказий аппарати ёки ҳудудий бўлими инспекторларини хабардор қилишлари ва муаммони дарҳол жойида бартараф этиш чоралари кўрилиши белгилаб олинди.
Йиғилишнинг ижобий жиҳатларидан яна бири ташаббускорлар пудратчилар, лойиҳа ташкилотлари, буюртмачилар билан яқиндан танишиб олишди ва қурилишда сифатга эришиш учун қандай тартибда ишлар олиб борилиши тушунтирилди.
Йиғилиш сўнг, инспекция раҳбарияти қурилиш-монтаж ишлари бошланган объектларга жойига чиққан ҳолда лойиҳа ҳужжатлари, бажарилган қурилиш ишлари билан танишиб, масъулларга қурилиш жараёнида сифат кўрсаткичларини таъминлаш юзасидан кўрсатмалар берди.