Унга кўра, авиация ходимлари ва фуқаро авиациясига қабул қилинаётган номзодлар тиббий кўрикдан ўтказилади. Тиббий кўрикдан ўтказиш тиббий-учиш комиссияси томонидан амалга оширилади.

Тиббий кўрикда ICAO талабларига асосан номзоднинг умумий соғлиғи, кўриш ва эшитиш қобилияти, руҳий ҳолати, касбий фаолиятга таъсир кўрсатиши мумкин бўлган хавф омиллари, шунингдек парвозлар хавфсизлигига салбий таъсир этиши мумкин бўлган касаллик ва ҳолатлар баҳоланади.

Тиббий кўрикдан ўтказиш натижасига кўра, авиация ходимлари ва номзодларга 1, 2 ёки 3-класс тиббий хулосалар берилади.

Тиббий хулоса номзоднинг касбий вазифаларни хавфсиз бажаришга жисмоний ва руҳий жиҳатдан яроқлилигини тасдиқловчи ҳужжат ҳисобланади.

Шунингдек, ушбу қоидаларда тиббий кўрикдан ўтказиш тартиби, тиббий хулосанинг амал қилиш муддатлари, учишдан олдинги ва кейинги тиббий кўрикларни ташкил этиш тартиби белгиланган.

Мазкур авиация қоидаларининг қабул қилиниши фуқаро авиацияси тизимида тиббий назоратни янада такомиллаштириш, авиация ходимларининг касбий яроқлилигини холис ва асосли баҳолаш, шунингдек, парвозлар хавфсизлигини таъминлашга қаратилган.