Oʻzbekiston Respublikasi Soliq qoʻmitasi

Joriy yilning 30-may kuni Soliq qo‘mitasi huzuridagi Jamoatchilik kengashining onlayn formatdagi yig‘ilishi bo‘lib o‘tdi. Unda Soliq qo‘mitasi raisi Sherzod Kudbiyev ishtirok etdi.

Yig‘ilish davomida kengash a’zolari tomonidan elektron hisobvaraq-fakturalar tizimi bo‘yicha ilgari surilgan 11 ta taklif atroflicha muhokama qilindi.

Soliq qo‘mitasi mutaxassislari kengash a’zolarining har bir taklifini batafsil ko‘rib chiqib, texnik va iqtisodiy asoslantirilgan holda qo‘mitaning rasmiy pozitsiyasini taqdim etdilar.

Ko‘rib chiqilgan 11 ta takliflardan 8 tasi qo‘llab-quvvatlandi, 1 tasi qisman qabul qilindi, 2 tasi esa ma’qullanmadi.

Elektron hujjat aylanishining zamonaviylashganini hisobga olgan holda 489-sonli Nizomni to‘liq qayta ko‘rib chiqish, asosli faoliyat turlari uchun elektron hisobvaraq-fakturalarni keyingi oyning 10-sanasigacha rasmiylashtirish imkoniyatini tiklash, Elektron hujjat aylanishi tizimida EHFni yillik muddatdan keyin ham tuzatish imkoniyatini yaratish, o'z kuchini yo'qotgan bitimlar bilan bog‘liq muammolarni hal etish, maxsus tartibda soliq bazasi aniqlanadigan operatsiyalar uchun alohida hisobvaraq-faktura shakllarini yaratish, rad etilgan hisobvaraq-fakturalarni qayta yuborishdagi muammolarni bartaraf etish bo'yicha takliflar qo'llab-quvvatlandi.

Internet-marketpleyslar orqali eksport qilinadigan, qiymati 5000 AQSh dollaridan kam bo‘lgan tovarlar uchun QQSning nol stavkasini qo‘llash mexanizmini yaratish bo‘yicha taklif muhokama qilindi. Soliq qo‘mitasi vakillari bu masalani yanada batafsil o‘rganish zarurligini bildirishdi.

Soliq qo‘mitasi raisining o‘rinbosari J.Abdiyev ushbu yo‘nalishda tegishli hujjatlar bilan birgalikda texnik yechim ishlab chiqish rejalari haqida ma’lumot berdi. Bu esa elektron tijoratning o‘sib borayotgan segmentini legallashtirish va soliq tushumlarini oshirishga xizmat qiladi.

Shuningdek, ayrim boshqa daromad va xarajatlar uchun bir tomonlama elektron hisobvaraq-fakturalarni boshqa elektron hujjatlar bilan almashtirish bo‘yicha takliflar ham qo‘llab-quvvatlandi.

Jamoatchilik  kengashining Elektron ishonchnomani rasmiylashtirish jarayonlarini texnik jihatdan soddalashtirish bo‘yicha takliflari yuristlar bilan kelishilgan holda qayta tayyorlanadi.

Soliq qo‘mitasi raisi Sh.Kudbiyev biznes vakillari bilan konstruktiv muloqot muhimligini alohida ta’kidlab, soliq tizimi ma’murchiligini yanada takomillashtirishga tayyor ekanliklarini bildirdi.

Kengash a’zolari Soliq qo‘mitasi mutaxassislarining kasbiy yondashuvi va texnik yechimlarning sifatli ishlab chiqilayotganini yuqori baholadilar.

Yig‘ilish yakunida normativ hujjatlarni takomillashtirish, Avtokameral tahlil formulalarini ko‘rib chiqish,  Ishchi guruhlar tuzish bo‘yicha keyingi harakatlar yo‘nalishlari belgilab olindi.

Soliq qo‘mitasi qabul qilingan takliflarni amalga oshirishni tez orada boshlaydi va ularning bajarilishi bo‘yicha Jamoatchilik kengashini doimiy ravishda xabardor qilib boradi.