Oʻzbekiston Respublikasi Istiqbolli loyihalar milliy agentligi hamda Soliq qoʻmitasining TEMU elektron savdo platformasi faoliyatini cheklash toʻgʻrisidagi AXBOROT XABARI
2025-03-04 14:30:00 / Qo'mita yangiliklari
#rasmiy_axborot
Hurmatli yurtdoshlar!
Elektron tijorat operatorlari, xususan, elektron savdo platformalari operatorlari sifatida faqat yuridik shaxslar — Oʻzbekiston Respublikasi rezidentlari faoliyat yuritishi mumkinligi belgilangan.
👉VMQ-885-son, 26.12.2024-yil
Mamlakatimiz fuqarolariga xizmat koʻrsatuvchi xorijiy elektron savdo platformalari faoliyatini oʻrganish jarayonida ayrim elektron savdo platformalari tomonidan Oʻzbekiston Respublikasining elektron tijorat, chakana savdo, reklama, shaxsiy maʼlumotlarni himoya qilish, isteʼmolchilar huquqlarini himoya qilish, mualliflik huquqi va turdosh huquqlar sohasidagi qonun hujjatlari talablariga rioya etmayotganligi aniqlandi.
Yuqoridagilardan kelib chiqib, Oʻzbekiston Respublikasi qonunchiligi talablariga muvofiq, 2025-yil 20-martdan boshlab xorijiy elektron savdo platformalaridan, xususan, “TEMU” platformasidan foydalanish belgilangan tartibda cheklanadi.
Tushunmovchiliklarni oldini olish maqsadida, yurtdoshlarimizdan bugungi kundan boshlab “TEMU” platformasida buyurtma bermasliklarini soʻraymiz.
❗️Bunda, agar buyurtma bundan oldin amalga oshirilgan boʻlsa, platformada toʻlovni qaytarishni tashkil etish tavsiya etiladi.
Istiqbolli loyihalar milliy agentligi va Soliq qoʻmitasi yurtdoshlarimizni Oʻzbekiston Respublikasi hududida oʻz faoliyatini mahalliylashtirmagan yoki mamlakatimizda Soliq qoʻmitasining elektron xizmatlar koʻrsatuvchi xorijiy kompaniyalar va marketpleyslar roʻyxatiga kirmagan xorijiy elektron savdo platformalari xizmatlaridan foydalanmaslikka, ehtiyot choralarini koʻrishga, shaxsiy va boshqa maʼlumotlarni bunday subyektlarga bermaslikka chaqiradi.
