Oʻzbekiston Respublikasi Soliq qoʻmitasi mutaxassislari IOTAning kiberxavfsizlik boʻyicha xalqaro konferensiyasida ishtirok etmoqda
2026-10-30 14:50:00 / Qo'mita yangiliklari
2026-yil 29–30-oktabr kunlari Vengriyaning Budapesht shahrida Yevropa soliq maʼmuriyatlari tashkiloti (IOTA)ning kiberxavfsizlik va axborotni himoya qilish masalalariga bagʻishlangan VII yillik xalqaro konferensiyasi boʻlib oʻtmoqda. Unda Oʻzbekiston Respublikasi Soliq qoʻmitasi mutaxassislari ham ishtirok etmoqda.
Konferensiya doirasida davlat boshqaruvini jadal raqamlashtirish sharoitida soliq organlarining kiberxavfsizligini taʼminlashga oid dolzarb masalalar koʻrib chiqilmoqda. Xususan, axborot tizimlarini himoya qilishning zamonaviy usullari, kibertahdidlarni aniqlash va ularning oldini olish, shuningdek, tahdidlarni monitoring qilish hamda axborot xavfsizligi bilan bogʻliq hodisalarga javob qaytarish jarayonlarini avtomatlashtirishda sunʼiy intellekt texnologiyalarini qoʻllashga alohida eʼtibor qaratilmoqda.
Alohida tematik sessiyalarda sunʼiy intellektni soliq maʼmuriyatchiligiga joriy etish bilan bogʻliq xavflarni baholash, raqamli infratuzilmani xavfsiz boshqarish, kiberhujumlarga javob qaytarish mexanizmlarini takomillashtirish hamda soliq organlari xodimlari oʻrtasida axborot xavfsizligi madaniyatini shakllantirish masalalari muhokama qilinmoqda.
Olingan bilimlar va amaliy tajriba Soliq qoʻmitasida axborot xavfsizligi tizimini yanada takomillashtirish, raqamli infratuzilmaning zamonaviy kibertahdidlarga nisbatan barqarorligini oshirish hamda raqamli davlat xizmatlari koʻlami kengayib borayotgan sharoitda soliq maʼlumotlarining ishonchli himoyasini taʼminlashga xizmat qiladi.