Oʻzbekiston Respublikasi Soliq qoʻmitasi

O‘zbekiston Respublikasi Soliq qo‘mitasining sun’iy intellekt texnologiyalari asosida faoliyat yurituvchi ai.soliq.uz platformasidagi xizmatlar takomillashtirildi. Soliq to‘lovchilarga yanada qulay va tezkor xizmat ko‘rsatish maqsadida yangi imkoniyatlar joriy etilib, uchta xizmat — “Ekspress audit”, “AI Muloqot” va “AI Assistent” foydalanuvchilar uchun taqdim etildi.

Platforma tadbirkorlar, buxgalterlar, korxona rahbarlari hamda jismoniy shaxslarga soliq masalalarini hal qilish, zarur ma’lumotlarni olish va soliq majburiyatlarini bajarishda sun’iy intellekt imkoniyatlaridan foydalanish imkonini beradi.

Yangi xizmatlar — yanada qulay imkoniyatlar

“Ekspress audit” — avvalgi “AI Korxona” xizmatining takomillashtirilgan shakli bo‘lib, korxonaning soliq holatini soliq inspektori nuqtayi nazaridan baholash imkonini beradi. Xizmat korxona faoliyatini kompleks tahlil qilish orqali mavjud muammo va kamchiliklarni aniqlaydi hamda ularni bartaraf etish bo‘yicha amaliy tavsiyalar beradi.

Bu tadbirkorlarga soliq bilan bog‘liq ehtimoliy muammolarni oldindan aniqlash, ularning sabablarini tushunish va zarur choralarni belgilashda yordam beradi.

“AI Muloqot” — soliq organlari bilan onlayn elektron chat orqali muloqot qilish, soliq xizmatlaridan foydalanish tartibi bo‘yicha ma’lumot olish va murojaatlar yuborish imkonini beruvchi xizmat.

Ushbu xizmat soliq to‘lovchilar va soliq organlari o‘rtasidagi raqamli muloqotni soddalashtirish hamda kerakli ma’lumotlarni qulay shaklda olishga ko‘maklashadi.

“AI Assistent” — jismoniy va yuridik shaxslarning soliqqa oid savollariga sodda va tushunarli tilda tezkor, asoslangan javoblar hamda amaliy tavsiyalar beruvchi xizmat.

Foydalanuvchilar ushbu xizmat yordamida soliq masalalariga oid savollariga javob topish, zarur tushuntirishlarni olish va keyingi harakatlarini belgilash imkoniyatiga ega bo‘ladilar.

Platformada yana qanday xizmatlar mavjud?

AI Soliq platformasi soliq to‘lovchilarning turli ehtiyojlariga mo‘ljallangan sun’iy intellekt asosidagi xizmatlarni birlashtiradi.

“AI Imtiyoz” xizmati soliq to‘lovchi foydalanishi mumkin bo‘lgan soliq imtiyozlarini aniqlash, ularni qo‘llash shartlarini tushunish va arizalar rad etilgan taqdirda buning sabablarini tahlil qilishga yordam beradi.

“AI Hisobot” xizmati soliq hisobotlari bo‘yicha majburiyatlarni tahlil qiladi, hisobotlarni topshirish muddatlari haqida ma’lumot beradi hamda ehtimoliy xatolarni aniqlash va ularni bartaraf etish bo‘yicha tavsiyalar taqdim etadi.

“AI EHF” elektron hisobvaraq-fakturalar bilan bog‘liq masalalarni tahlil qilish va ular yuzasidan zarur ma’lumotlarni olishga yordam beradi.

“AI Reyting” tadbirkorlik subyektlarining barqarorlik reytingi bilan bog‘liq ma’lumotlarni olish va tegishli ko‘rsatkichlarni tushunish imkonini beradi.

“AI Avtokameral” soliq hisobotlarida aniqlangan tafovutlarni tahlil qilishga yordam beradi, aniqlangan tafovutlar va ularni bartaraf etish bo‘yicha zarur tushuntirishlar olishga ko‘maklashadi.

“AI Keshbek” keshbek bilan bog‘liq masalalar yuzasidan ma’lumot va tushuntirishlar olish imkonini beradi.

AI Soliq platformasining rivojlantirilishi soliq xizmatlarini raqamlashtirish, foydalanuvchilar uchun qulayliklarni oshirish va soliq ma’muriyatchiligini takomillashtirishga qaratilgan.

Sun’iy intellekt texnologiyalari katta hajmdagi ma’lumotlarni tahlil qilish, zarur ma’lumotlarni tezkor taqdim etish va foydalanuvchilarga amaliy tavsiyalar berish imkoniyatlarini kengaytiradi.

Bunda sun’iy intellekt inson faoliyatini to‘liq almashtirish uchun emas, balki uning mehnat samaradorligini oshirish, takrorlanuvchi jarayonlarni soddalashtirish va xizmatlar sifatini yaxshilash uchun qo‘llaniladi.

AI Soliq platformasidagi xizmatlardan ai.soliq.uz manzili orqali foydalanish mumkin.

AI Soliq – aqlli texnologiyalar, qulay xizmatlar!

Soliq qo‘mitasi matbuot xizmati