Bank hisobvaraqlari boʻyicha operatsiyalarni toʻxtatib turish tartibiga oʻzgartishlar kiritildi
2026-10-23 14:30:00 / Qo'mita yangiliklari
Tadbirkorlik subyektlarining huquq va qonuniy manfaatlarini himoya qilish hamda ular faoliyatidagi ortiqcha maʼmuriy tartib-taomillarni kamaytirish maqsadida, 2026-yil 20-oktyabrda OʻRQ–1183-son Qonun bilan Soliq kodeksiga bank hisobvaraqlari boʻyicha operatsiyalarni toʻxtatib turishga oid oʻzgartirish va qoʻshimchalar kiritildi.
Nima oʻzgardi?
Avval soliq organi bank hisobvaraqlari boʻyicha operatsiyalarni oʻn kungacha toʻxtatib turishi, ushbu muddatni uzaytirish uchun esa sudga murojaat qilishi lozim edi.
Yangi tartibda oʻn kunlik cheklov olib tashlandi. Soliq toʻlovchi yoki soliq agenti qarorga eʼtiroz bildirmasa, operatsiyalarni toʻxtatib turishni davom ettirish uchun sudga murojaat qilish talab etilmaydi. Bunda operatsiyalarni toʻxtatib turishga asos boʻlgan holatlar bartaraf etilgach, soliq organi oʻz qarorini Soliq kodeksining 112-moddasiga muvofiq bekor qiladi.
Qarorga eʼtiroz bildirilsa-chi?
Soliq toʻlovchi yoki soliq agenti eʼtiroz bildirgan taqdirda, operatsiyalarni toʻxtatib turish masalasi soliq organining eʼtiroz taqdim etilgan kundan keyin uch kundan kechiktirmay bergan arizasiga asosan sud tomonidan koʻrib chiqiladi. Sud qaror qabul qilguniga qadar operatsiyalar toʻxtatib turiladi.
Sudga beriladigan arizaga qonun talablari buzilganligini va xabarnoma yuborilganligini tasdiqlovchi dalillar hamda soliq toʻlovchining eʼtirozi ilova qilinadi.
Sudning operatsiyalarni toʻxtatib turishni rad etish toʻgʻrisidagi qarori qonuniy kuchga kirgan kunda ham cheklov bekor qilinadi.