O‘zbekiston va IHTT xalqaro soliq axboroti almashinuvini rivojlantirish masalalarini muhokama qildilar
2026-10-05 18:15:00 / Qo'mita yangiliklari
Ishchi missiya doirasida O‘zbekiston Respublikasi delegatsiyasi Iqtisodiy hamkorlik va taraqqiyot tashkiloti (IHTT)ning Soliq maqsadlarida shaffoflik va axborot almashinuvi bo‘yicha Global forum Kotibiyati vakillari bilan uchrashuv o‘tkazdi.
Asosiy e’tibor Kriptoaktivlar bo‘yicha hisobot berish tizimi (Crypto-Asset Reporting Framework — CARF) doirasida tegishli yurisdiksiyalarni aniqlash jarayoniga, shuningdek, O‘zbekistonning CARF guruhi tomonidan o‘tkazilgan baholash natijalariga qaratildi.
Tomonlar ushbu yo‘nalishdagi keyingi qadamlarni, jumladan, qo‘shimcha ma’lumotlarni taqdim etish hamda Global forum Kotibiyati bilan hamkorlikni davom ettirish masalalarini muhokama qildilar.
Shuningdek, Soliq masalalari bo‘yicha o‘zaro ma’muriy yordam to‘g‘risidagi Konvensiyani (MAC) amaliyotga joriy etish uchun zarur bo‘lgan tartib-taomillarni jadallashtirish masalalari, shuningdek, moliyaviy hisobvaraqlar to‘g‘risidagi axborotni avtomatik almashish uchun Hisobot berishning umumiy standarti (Common Reporting Standard — CRS)ni joriy etish bo‘yicha amaliy ishlarni boshlash istiqbollari ko‘rib chiqildi.
Alohida ravishda xalqaro avtomatik axborot almashinuvi mexanizmlarini joriy etish uchun zarur tayyorgarlik tadbirlari, keyingi harakatlar ketma-ketligi va ularni amalga oshirishning ehtimoliy muddatlari muhokama qilindi.
Uchrashuv yakunlari bo‘yicha tomonlar yuqorida qayd etilgan yo‘nalishlarda yaqin hamkorlikni davom ettirishga kelishib oldilar.