Oʻzbekiston Respublikasi Soliq qoʻmitasi

Soliq qoʻmitasi delegatsiyasi Iqtisodiy hamkorlik va taraqqiyot tashkiloti (IHTT)ning Soliq maqsadlarida shaffoflik va axborot almashinuvi boʻyicha Global forumi Ekspert baholash va monitoring guruhi (PRMG)ning navbatdagi yigʻilishida ishtirok etdi.

Parij shahrida boʻlib oʻtgan ishchi sessiyalarda Oʻzbekiston Respublikasi Global forum tomonidan oʻtkazilayotgan ekspert baholash doirasida baholanayotgan yurisdiksiya sifatida ishtirok etdi.

Oʻzbekistonning ekspert baholash jarayoni qariyb bir yil davom etdi.

Ushbu jarayon Soliq qoʻmitasining Global forum baholovchi ekspertlari guruhi bilan yaqin hamkorligida, tegishli vazirlik va idoralar ishtirokida amalga oshirildi.

Jarayon doirasida tegishli vazirlik va idoralarning qonunchilik bazasi hamda faoliyat amaliyoti kompleks tahlil qilinib, maʼmuriy tartib-taomillarning xalqaro standartlarga muvofiqligi oʻrganildi.

Ishchi sessiyalar soʻrov asosida axborot almashinuvi xalqaro standarti (EOIR — Exchange of Information on Request)ning joriy etilishini baholash va oʻtkazilgan ekspert ishi natijalarini muhokama qilishga bagʻishlandi.

 

Oʻzbekiston Respublikasi 2022-yildan buyon IHTTning Soliq maqsadlarida shaffoflik va axborot almashinuvi boʻyicha Global forumi aʼzosi hisoblanadi.

Belgilangan tartib-taomillarga muvofiq, ekspert baholash jarayonidan oʻtish Global forum aʼzosi boʻlgan yurisdiksiyalar uchun majburiy boʻlib, ularning qonunchiligi va amaliyoti shaffoflik hamda soʻrov asosida axborot almashinuvi xalqaro standartiga qay darajada muvofiqligini aniqlashga qaratilgan.

Oʻzbekiston Respublikasining mazkur jarayonda ishtiroki soliq shaffofligi boʻyicha xalqaro standartlarni izchil joriy etish hamda xorijiy soliq maʼmuriyatlari bilan hamkorlikni rivojlantirish borasidagi ishlar davom etayotganini koʻrsatadi.

Ekspert baholashning rasmiy hisoboti va natijalari belgilangan tartib-taomillar yakunlanganidan soʻng IHTTning rasmiy veb-saytida eʼlon qilinadi.