G‘oyalar maydoni qizidi: “Yosh soliqchi – 2026” forumida kelajak yechimlari taqdim etildi
2026-08-04 13:10:00 / Qo'mita yangiliklari
#yosh_soliqchi_2026
“Yosh soliqchi – 2026” forumining ikkinchi ish kuni yuqori kayfiyat va qizg‘in muhokamalar bilan boshlandi.
Kunning dastlabki sessiyasida forum hamkori — Yandex kompaniyasi vitse-prezidenti soliq xizmatlarini raqamlashtirishning bugungi holati, sun’iy intellekt imkoniyatlari hamda bu jarayonlarda yosh mutaxassislarning o‘rni haqida muhim fikr-mulohazalar bilan o‘rtoqlashdi.
Biroq kunning eng kutilgan va eng qiziqarli qismi, shubhasiz, viloyat soliq organlari yoshlari ishtirok etgan “Innovatsion yechimlar tanlovi” bo‘ldi.
Yoshlar tomonidan taqdim etilgan g‘oyalar soliq tizimini yanada zamonaviy, qulay va insonparvar qilishga qaratilgani bilan alohida e’tiborga sazovor bo‘ldi.
🔹 Qoraqalpog‘iston Respublikasi jamoasining “Soliq Quest” loyihasi soliq bilimlarini o‘yinlashtirilgan va interaktiv usullar orqali o‘rgatishni taklif qildi.
🔹 Jizzax viloyati jamoasi tomonidan ilgari surilgan “Fermerlar kalendari” taklifi esa qishloq xo‘jaligi subyektlari uchun soliq to‘lovlarini ekin turi, hosil davri va real daromad tushish vaqtiga moslashtirilgan shaxsiy kalendar asosida tashkil etish g‘oyasini ilgari surdi.
🔹 Qashqadaryo viloyati jamoasining “Soliq Start” mobil ilovasi esa yosh tadbirkorlar va frilanserlar uchun smart-kalkulyator, soliq kalendari, imtiyozlar xaritasi, qisqa videodarslar, testlar hamda 24/7 rejimida ishlovchi AI-konsultantni yagona platformada jamlashni taklif etdi.
Bu taqdimotlar bir haqiqatni yana bir bor isbotladi: forum nafaqat fikr almashish maydoni, balki amaliy yechimlar tug‘iladigan innovatsiyalar platformasiga aylanmoqda.
“Yosh soliqchi – 2026” yangi g‘oyalar, yangi qarashlar va kelajak soliq xizmatining poydevorini yaratayotgan iqtidorli yoshlarni birlashtirmoqda.