Soliq va tadbirkorlik sohasida qonunchilik takomillashtirildi

O‘zbekiston Respublikasining “Soliq va tadbirkorlik sohasidagi ayrim qonun hujjatlariga o‘zgartish va qo‘shimchalar kiritish to‘g‘risida”gi Qonuni bilan mazkur sohada muhim o‘zgartishlar amalga oshirildi.
O‘RQ-1131-son, 17.04.2026-yil 

Qonunning asosiy maqsadi - tadbirkorlik faoliyati uchun qulay shart-sharoitlar yaratish, soliq intizomini mustahkamlash hamda iqtisodiyotda shaffoflikni ta’minlashdan iborat.

Jinoyat kodeksiga kiritilgan o‘zgartishlar

Qonun bilan Jinoyat kodeksining quyidagi moddalari yangi tahrirda bayon etildi:

179-modda (soxta tadbirkorlik) - javobgarlik kuchaytirildi, jumladan jarima, muayyan huquqlardan mahrum qilish va ozodlikdan mahrum qilish kabi sanksiyalar nazarda tutildi;

184-modda (soliqlarni to‘lashdan bo‘yin tovlash) - jinoyat tarkibi aniqlashtirilib, jarima, majburiy to‘lovlarni undirish va ozodlikdan mahrum qilish choralari qayta belgilandi;

ilk huquqbuzarlikda zarar to‘liq qoplansa, javobgarlikdan ozod etish tartibi saqlab qolindi;

jinoyat ishlarida jamoat himoyachisi ishtiroki ta’minlandi.

Ma’muriy javobgarlik to‘g‘risidagi kodeksga kiritilgan o‘zgartishlar

Qonunga muvofiq MJTKning quyidagi moddalari takomillashtirildi:

174-modda - soliq huquqbuzarliklari uchun jarimalar miqdori va qo‘llash tartibi qayta ko‘rib chiqildi;

264-modda - soliq organlarining vakolatlari aniqlashtirildi;

263¹-modda - vakolatli organlar funksiyalari belgilandi.

Qonun rasman e’lon qilingan kundan e’tiboran 3 oy o‘tgach kuchga kiradi.

Qonun soliq sohasida javobgarlik muqarrarligini ta’minlash, huquqbuzarliklarning oldini olish va tadbirkorlik subyektlarini himoya qilishga xizmat qiladi.

Ma'muriy amaliyot boshqarmasi