Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi

Parranda goʻshti (tovuq, kurka) oson hazm boʻladigan oqsil, B guruhi vitaminlari va muhim minerallarga boy qimmatli parhez mahsuloti hisoblanadi. U mushaklarni shakllantirishga yordam beradi, yurak faoliyatini qoʻllab-quvvatlaydi va oshqozonga ortiqcha yuklama bermaydi. Shu bois u sogʻlom ovqatlanishning muhim tarkibiy qismi sanaladi.

Asosiy foydali xususiyatlari

1. Organizm uchun muhim qurilish materiali hisoblanadi.

Parranda goʻshti tarkibidagi oqsil tez hazm boʻladi va organizmni hujayralar hamda mushaklarning oʻsishi uchun zarur boʻlgan aminokislotalar bilan taʼminlaydi.

2. Yogʻ miqdori kam.

Oq goʻsht (ayniqsa, tovuq koʻkrak qismi) tarkibida yogʻ miqdori kam boʻlib, vaznni nazorat qilishga yordam beradi.

3. Yurak uchun foydali.

Tovuq va kurka goʻshtida qizil goʻshtga nisbatan toʻyingan yogʻ miqdori kamroq boʻladi. Bu yurak-qon tomir tizimi uchun foydali hisoblanadi.

4. Qon hosil boʻlishiga yordam beradi.

Parranda goʻshti tarkibida temir, ruh va B guruhi vitaminlari mavjud. Bu moddalar qon hosil boʻlishida muhim ahamiyatga ega.

Kaliy va B guruhi vitaminlari qon tomirlari faoliyatini qoʻllab-quvvatlaydi hamda qon bosimining meʼyorda boʻlishiga yordam beradi.

5. Oson hazm boʻladi.

Parranda goʻshti oshqozonda ogʻirlik hissini keltirib chiqarmaydi va parhezbop hamda bolalar ovqati uchun mos hisoblanadi.

Tarkibidagi foydali moddalar:

• B guruhi vitaminlari (B6 va B12)

Asab tizimi faoliyatini yaxshilaydi va moddalar almashinuvini tartibga soladi.

• Temir va ruh

Qonning kislorod tashish xususiyatini yaxshilaydi va immunitetni mustahkamlaydi.

• Fosfor va magniy

Suyaklar hamda tishlarni mustahkamlashga yordam beradi.

Tanlash va tayyorlash boʻyicha tavsiyalar

• Goʻshtni isteʼmol qilishdan oldin terisini olib tashlash tavsiya etiladi, chunki yogʻ va kaloriyaning asosiy qismi terida toʻplanadi.

• Eng parhezbop mahsulot sifatida oq goʻshtni (koʻkrak qismini) tanlash maqsadga muvofiq.

• Parranda goʻshtini qaynatish, dimlash yoki tandirda pishirish usullaridan foydalanish kerak, koʻp miqdorda yogʻda qovurishdan esa saqlanish lozim.

! Eslatma:

Parranda go‘shtini yaxshi pishirish, saqlash qoidalariga rioya qilish va uni ishonchli savdo nuqtalaridan xarid qilish lozim.

Sanepidqo‘mita

Axborot xizmati

@sanepidcommittee