Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi

Basseynda cho‘milish — dam olish va sog‘liqni mustahkamlashning eng yaxshi usullaridan biri. Biroq u faqatgina qoidalarga amal qilingan taqdirdagina xavfsiz va foydali bo‘ladi. Basseyn muhitida gigiyena va xavfsizlik talablariga rioya qilish har bir inson uchun juda muhim hisoblanadi.
      Basseynga kirishdan avval shaxsiy gigiyenaga alohida e’tibor qaratish lozim. Avvalo, suvga tushishdan oldin sovun bilan dush qabul qilish shart. Bu tanadan mikroblar va kirlarni yo‘qotib, suvning tozaligini saqlashga yordam beradi.
Shuningdek, basseynga faqat maxsus cho‘milish kiyimi — kupalnik yoki plavki bilan kirish kerak. Bu nafaqat gigiyenik talab, balki umumiy tartib-qoidalarning bir qismi hamdir.
      Sochlar suvga tushib ketmasligi uchun cho‘milish shapkasini kiyish tavsiya etiladi. Bu suvning tozaligini saqlashga yordam beradi. Basseyn atrofida esa rezina shippakda yurish lozim, chunki pol sirpanchiq bo‘lishi mumkin.
Bundan tashqari, teri kasalliklari yoki yuqumli xastaliklar mavjud bo‘lganda basseynga kirish qat’iyan taqiqlanadi. Bu boshqalar salomatligini himoya qilish uchun juda muhim.

Xavfsizlik qoidalari — baxtsiz hodisalarning oldini oladi
 
      Basseyn hududida ehtiyotkorlikka amal qilish juda zarur. Masalan, basseyn atrofida yugurish mumkin emas, chunki pol sirpanchiq bo‘lib, yiqilish xavfi yuqori.
Shuningdek, noma’lum yoki chuqur joylarga bosh bilan sakrash qat’iyan taqiqlanadi. Bu jiddiy jarohatlarga olib kelishi mumkin. Har doim chuqurlikni tekshirib, o‘zingizga mos joyda cho‘milish lozim.
    Bolalarni basseyn yonida nazoratsiz qoldirish mumkin emas. Kattalar doimo ularni kuzatib turishi kerak. Suvda bir-birini cho‘ktirish, hazillashish yoki qaltis harakatlar qilish ham xavfli va taqiqlanadi.

Umumiy taqiqlar va tavsiyalar

Ovqatlangandan keyin darhol basseynga tushish tavsiya etilmaydi. Kamida 1–1,5 soat kutish organizm uchun xavfsiz hisoblanadi.
Basseyn hududiga shisha idishlar olib kirish mumkin emas, chunki ular singanda jarohat yetkazishi mumkin. Shuningdek, cho‘milayotganda saqich chaynash nafas yo‘lini to‘sib qo‘yishi ehtimoli bor.
     Eng muhimi, basseynga har doim toza holda kirish, tartibga rioya qilish va bir-biringizga hurmat bilan munosabatda bo‘lish zarur. 
    Basseynda cho‘milish — juda qiziqarli va foydali mashg‘ulot. Biroq qoidalarga amal qilinmasa, u xavfli bo‘lishi mumkin. Shuning uchun har bir kishi gigiyena va xavfsizlik talablariga rioya qilishi, ayniqsa bolalarga bu qoidalarni tushuntirishi muhim.
Qoidalarga amal qilsak, dam olish ham maroqli, ham xavfsiz bo‘ladi.

Sanepidqo‘mita

Axborot xizmati

@sanepidcommittee