Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi

2025-yil davomida Sanitariya-epidemiologik osoyishtalik va jamoat salomatligi qo‘mitasi tizimida korrupsiyaning oldini olish, xizmatlar shaffofligini oshirish va xavf-xatarlarni kamaytirishga qaratilgan tizimli ishlar amalga oshirildi.

 Jumladan, 2025-yilda Sanitariya-epidemiologiya sohasida korrupsiyaga qarshi kurashish va uning oldini olishga qaratilgan tashkiliy-huquqiy mexanizmlarni mustahkamlash maqsadida Sanepidqo‘mning tegishli buyrug‘i asosida 14 ta ichki me’yoriy-huquqiy hujjat ishlab chiqilib, belgilangan tartibda qabul qilindi.

Mazkur hujjatlar xizmat faoliyatida shaffoflikni ta’minlash, manfaatlar to‘qnashuvini bartaraf etish, xodimlarning mas’uliyati va hisobdorligini oshirish, xizmat safarlari, xalqaro va boshqa rasmiy tadbirlar munosabati bilan olinishi mumkin bo‘lgan sovg‘a qiymati, uni tasarruf etish tartibi, korrupsiyaga oid huquqbuzarlik haqida xabar bergan yoki korrupsiyaga qarshi kurashishga ko‘maklashgan xodimlarni rag‘batlantirish hamda korrupsiya xavfini kamaytirishga xizmat qiladi.

Sanepidqo‘m faoliyatida korrupsiyaviy holatlarning oldini olishga qaratilgan tizimli yondashuvni shakllantirish maqsadida korrupsiyaviy xavf-xatarlar xaritasi ishlab chiqilib, tasdiqlandi. Mazkur xaritada korrupsiya xavfi yuqori bo‘lgan yo‘nalishlar, jarayonlar va funksiyalar aniqlanib, ularni kamaytirish va bartaraf etish bo‘yicha aniq mexanizmlar belgilandi.

Shuningdek, aniqlangan xavf-xatarlarga asoslangan holda korrupsiyaga qarshi kurashish dasturi ishlab chiqilib, uning ijrosini ta’minlash bo‘yicha mas’ul tuzilmalar va amalga oshirish muddatlari belgilandi.

Korrupsiyaviy xavf-xatarlar xaritasini kompleks tahlil qilish natijalariga ko‘ra, sanitariya-epidemiologik osoyishtalik va jamoat salomatligi sohasidagi faoliyat yo‘nalishlari korrupsiya xavfi darajasiga qarab tasniflandi.

Jumladan, korrupsiyaviy xavf-xatarlari yuqori darajada baholangan 7 ta soha aniqlanib, mazkur yo‘nalishlarda nazorat va profilaktik choralarni kuchaytirish zarurligi belgilandi. Shuningdek, korrupsiya xavfi o‘rta darajada deb topilgan 17 ta soha bo‘yicha oldini olishga qaratilgan tizimli chora-tadbirlar ishlab chiqildi.

Bundan tashqari, Huquqni muhofaza qilish akademiyasi bilan hamkorlikda korrupsiyaviy xavf-xatarlar yuqori bo‘lgan yo‘nalishlarda faoliyat yurituvchi xodimlar uchun “Korrupsiyaviy xavf-xatarlarni bartaraf etish” mavzusida, shuningdek, korrupsiyaga qarshi kurashish bo‘yicha ichki nazorat tuzilmalari xodimlari uchun “Korrupsiyaga qarshi kurashish menejment tizimining samarali faoliyatini ta’minlash” mavzusida maxsus o‘quv kurslari tashkil etildi. Mazkur o‘quv mashg‘ulotlarida 400 nafardan ortiq soha xodimning ishtiroki ta’minlanib, ularning korrupsiyaga qarshi bilimlari va amaliy malakalari sezilarli darajada oshirildi.

Shu fursatdan foydalangan holda, Sanepidqo‘m va uning tizim muassasalari xodimlari tomonidan qonun buzilishiga doir holatlar yoki ijtimoiy soha obyektlarida xususan davolash-profilaktika hamda maktab va maktabgacha ta’lim muassasalarida nazorat tadbirlarini amalga oshirish chog‘ida hamda Davlat xizmatlarini ko‘rsatish paytida, jumladan ruxsatnomalar va mahsulotlarga sanitariya-epidemiologik xulosa olish jarayonida noqonuniy harakatlarni ilg‘agudek (ko‘rsangiz, sezsangiz va guvoh bo‘lsangiz) bo‘lsangiz, Sanepidqo‘mning quyidagi  78/ 888 01 01 (066) (011) yoki qisqa 1354 raqamli aloqa tizimi orqali xabar berishingizni so‘raymiz! Bundan tashqari, @Sanepidmurojaatbot telegram boti orqali o‘z murojaatlaringizni qoldirishingiz mumkin.

Jismoniy va yuridik shaxslarning murojaatlarini “Ishonch telefonlari” orqali qabul qilish haftaning dam olish kunlaridan tashqari, har kuni soat 9:00 dan 18:00 gacha amalga oshiriladi.

Murojaatlar anonimligi va qo‘ng‘iroq egasi tomonidan berilgan ma’lumotlar sir tutilishi kafolatlanadi. Ishonch telefoni orqali kelib tushgan murojaat qonunchilikka asosan ko‘rib chiqiladi.

Korrupsiyaga qarshi birgalikda kurashaylik!

Sanepidqo‘mita

Axborot xizmati

@sanepidcommittee