O‘zbеkistоn Rеspublikаsi Tashqi ishlаr vаzirligi

Joriy yilning 14-may kuni Tashqi ishlar vazirligi huzuridagi Jamoatchilik kengashining navbatdagi yig‘ilishi bo‘lib o‘tdi.

Tadbir avvalida tashqi ishlar vazirining birinchi o‘rinbosari Bahromjon A’loyev Jamoatchilik kengashi ochiq tashqi siyosat yuritish, jamiyat bilan doimiy muloqotni ta’minlash va fuqarolarning tashqi siyosatga bo‘lgan ishonchini mustahkamlashga xizmat qiluvchi muhim platforma ekanligini ta’kidladi.

Yig‘ilish kun tartibiga muvofiq tashqi siyosat idorasining o‘tgan davrdagi faoliyatining asosiy natijalariga to‘xtalib, O‘zbekiston ochiq, pragmatik va faol tashqi siyosat yuritib, xalqaro maydonda nufuzi tobora ortib borayotganligi qayd etildi.

Iqtisodiy diplomatiya yo‘nalishida investitsiyalar, eksport hajmini oshirish, xalqaro bozorga chiqish uchun qulay shart-sharoitlarni yaratish, grant va moliyaviy-texnik mablag‘larni jalb qilish, hududlar bilan ishlash, migratsiya hamda turizm kabi sohalarda Vazirlik va diplomatik vakolatxonalarimiz tomonidan amalga oshirilayotgan ishlar to‘g‘risida batafsil ma’lumot berildi.

Shuningdek, tadbir doirasida mintaqaviy va global masalalar yuzasidan ochiq muloqot tashkil etilib, fuqarolik jamiyati vakillari bilan faol fikr almashinuvi o‘tkazildi.

O‘z navbatida, ishtirokchilar tomonidan xorijda O‘zbekiston imijini yanada mustahkamlash, mamlakatimizning turizm salohiyatini keng targ‘ib etish, shuningdek, xalqaro miqyosda madaniy-gumanitar almashinuvni rivojlantirishga qaratilgan bir qator tashabbus va takliflar ilgari surildi.

Xususan, ommaviy axborot vasitalari xodimlarini siyosiy va huquqiy savodxonligini oshirish, diplomatik faoliyat, tashqi siyosat va davlat boshqaruvi tizimi bo‘yicha bilimlarini chuqurlashtirish, shuningdek, ularning kasbiy tajribasini oshirishga qaratilgan malaka oshirish va trening kurslarini hamda media-loyihalarni yo‘lga qo‘yish lozimligi ta’kidlandi.

Shuningdek, faxriy diplomatlar bilan ishlash guruhini tashkil etish tashabbusi, diplomatik tajribani yangi avlodga yetkazish va xalqaro munosabatlarda uzviylikni ta’minlash yo‘lida muhim qadamlardan biri bo‘ldi.

Uchrashuv yakunlari bo‘yicha Tashqi ishlar vazirligi huzuridagi Jamoatchilik kengashi yangilangan Ish rejasi va Nizomi tasdiqlandi. Ushbu hujjatlar kengash faoliyatini tizimli, samarali va ochiq asosda olib borish, TIV va fuqarolik jamiyati o‘rtasidagi hamkorlikni yanada kuchaytirishga xizmat qiladi.

Jamoatchilik kengashi Tashqi ishlar vazirligi va fuqarolik jamiyati o‘rtasida ishonchli ko‘prik vazifasini bajarishda davom etadi.