17-fevral kuni O‘zbekiston Tashqi ishlar vaziri maslahatchisi Munira Aminova BMT Oziq-ovqat va qishloq xo‘jaligi tashkilotining (FAO) O‘zbekistondagi vakili o‘rinbosari Sherzod Umarov bilan uchrashdi.
Uchrashuvda O‘zbekiston va FAO o‘rtasidagi hamkorlikning dolzarb masalalari, ekologik barqaror loyihalarni amalga oshirish uchun xalqaro jamg‘armalar va donor davlatlarni jalb qilish, barqaror rivojlanish va modernizatsiya masalalariga e’tibor qaratildi. Qishloq xo‘jaligi ishlab chiqarishini diversifikatsiya qilish va uning bioxilma-xilligini saqlash bo‘yicha genbanklarni rivojlantirish masalalari muhokama qilindi.
Tashqi ishlar vazirligi ushbu loyihalarni amalga oshirishda hamda oziq-ovqat xavfsizligini ta’minlash, qishloqlarni barqaror rivojlantirish va mamlakat aholisi farovonligini oshirish sohasidagi maqsadlarga erishish uchun samarali hamkorlikni davom ettirishda FAOni qo‘llab-quvvatlashga tayyorligini bildirdi.
