Bekobod shahrida ko‘p qavatli uy-joylar infratuzilmasini yanada rivojlantirish bo‘yicha o‘rganish ishlari olib borilmoqda
2026-07-11 14:00:00 / Vazirlik yangiliklar
Toshkent viloyati Bekobod shahrida ko‘p qavatli uy-joylar infratuzilmasini yanada rivojlantirish bo‘yicha o‘rganish ishlari olib borilmoqda.
Vazir o‘rinbosari Ozoda Jo‘rayeva Toshkent viloyati Bekobod shahri 14-daha hududida joylashgan “Do‘stlik” mahallasida bo’lib, “Bekobod Ideal Kommunal Servis” boshqaruv kompaniyasi faoliyati bilan yaqindan tanishdi.
Bugungi kunda mazkur boshqaruv kompaniyasi 112 ta ko‘p qavatli uyga sifatli xizmat ko‘rsatib kelmoqda. Korxonada 50 nafardan ortiq xodim mehnat qilmoqda hamda 4 ta yirik maxsus texnika va zamonaviy moddiy-texnik baza bilan ta’minlangan. Bu esa aholiga kommunal xizmatlarni tezkor va samarali ko‘rsatish imkonini yaratmoqda.
Kompaniya asosan 1970-yillarda qurilgan 2 va 4 qavatli uylarga xizmat ko‘rsatish bilan birga, ularda kapital ta’mirlash ishlarini ham muntazam amalga oshirib kelmoqda.
Jarayonda davlatimiz rahbarining topshiriqlari ijrosi doirasida eski ko‘p qavatli uylar joylashgan hududlarda infratuzilmani rivojlantirish masalalari o‘rganildi.
Xususan, aholi uchun qulay va zamonaviy muhit yaratish maqsadida ekobog‘lar, bolalar va sport maydonchalari, obodlashtirilgan dam olish maskanlarini barpo etish hamda ushbu hududlarda Yangi O‘zbekiston massivlaridagi kabi zamonaviy infratuzilmani joriy etish bo‘yicha amalga oshirilayotgan ishlar ko‘zdan kechirildi.
Bunday tashabbuslar aholining turmush sifati va yashash sharoitlarini yanada yaxshilash, mahallalar qiyofasini zamonaviylashtirish hamda qulay va obod yashash muhitini yaratishga xizmat qiladi.