Islom taraqqiyot banki vakillari bilan qurilish sohasidagi islohotlar muhokama qilindi
2026-07-09 17:30:00 / Vazirlik yangiliklar
Qurilish va uy-joy kommunal xo‘jaligi vazirligida Islom taraqqiyot banki vakillari bilan uchrashuv bo‘lib o‘tdi. Unda qurilish sohasini raqamlashtirish, zamonaviy qurilish standartlarini joriy etish, loyihalarni boshqarish tizimini takomillashtirish hamda xalqaro hamkorlikni kengaytirish masalalari muhokama qilindi.
Uchrashuv davomida vazirlik tomonidan ishlab chiqilgan “Shaffof qurilish” milliy axborot tizimining bugungi kundagi faoliyati va uni yanada rivojlantirish istiqbollari yuzasidan taqdimot o‘tkazildi. Xususan, platforma orqali loyihalash, qurilish jarayonlari va pudrat tashkilotlari faoliyatini monitoring qilish, nazorat mexanizmlarini kuchaytirish hamda sohada ochiqlik va shaffoflikni ta’minlash borasida amalga oshirilayotgan ishlar haqida ma’lumot berildi.
Tomonlar qurilish normalari va qoidalarini xalqaro talablar asosida takomillashtirish masalalariga ham alohida e’tibor qaratdilar. Xususan, EN va ISO standartlarini milliy tizimga bosqichma-bosqich joriy etish, energiya samaradorligi, “yashil” qurilish, seysmik xavfsizlik va iqlim o‘zgarishiga moslashuv yo‘nalishlarida amalga oshirilayotgan islohotlar muhokama qilindi. Shuningdek, yangi me’yor va standartlarni hududiy bo‘linmalar hamda soha mutaxassislariga tezkor yetkazish maqsadida interaktiv axborot platformasini yaratish rejalari taqdim etildi.
Muloqot davomida qurilish obyektlarida sifat nazoratini kuchaytirish, qurilish nazorati mexanizmlarini takomillashtirish, yangi standartlarni amaliyotga samarali tatbiq etish hamda mutaxassislarning malakasini muntazam oshirib borish masalalari yuzasidan fikr almashildi.
Shuningdek, binolarning energiya samaradorligini sertifikatlash tizimini yaratish, energiya auditi mexanizmlarini rivojlantirish hamda xalqaro moliya institutlari bilan hamkorlikda amalga oshirilayotgan tashabbuslar ko‘rib chiqildi. Sertifikatlovchi tashkilotlar reyestrini shakllantirish va ushbu yo‘nalishda ilg‘or xalqaro tajribani joriy etish masalalari ham muhokama markazida bo‘ldi.
Uchrashuvda davlat xaridlari va tender jarayonlarini yanada takomillashtirish masalalariga ham to‘xtalib o‘tildi. Vazirlik mutaxassislari amaldagi tartibga ko‘ra loyihalash, qurilish va jihozlash ishlari turli vakolatli organlar mas’uliyatiga kirishi sababli alohida tenderlar orqali amalga oshirilishini ma’lum qildilar. Shu bilan birga, istiqbolda ayrim loyihalarda qurilish va jihozlash ishlarini yagona tender asosida tashkil etish imkoniyatlari, buning uchun zarur huquqiy va institutsional o‘zgarishlar, xarajatlarni baholash metodologiyasini takomillashtirish hamda xavflarni boshqarish mexanizmlarini rivojlantirish masalalari yuzasidan o‘zaro fikr almashildi.
Uchrashuv yakunida tomonlar qurilish sohasini raqamlashtirish, xalqaro standartlarni keng joriy etish, axborot tizimlarini rivojlantirish, davlat xaridlari tizimini takomillashtirish hamda o‘zaro hamkorlikni izchil davom ettirish bo‘yicha kelgusidagi ustuvor yo‘nalishlarni belgilab oldilar.