Kuz-qish mavsumiga tayyorgarlik, 48-son qarori ijrosi, murojaatlar bilan ishlash va ijro intizomi muhokama qilindi
2026-07-08 18:35:00 / Vazirlik yangiliklar
Qurilish va uy-joy kommunal xo‘jaligi vazirligida hududlarda ko‘p kvartirali uylarni kuz-qish mavsumiga tayyorlash, davlatimiz rahbarining 48-son qarori ijrosi, sohani raqamlashtirish, murojaatlar bilan ishlash hamda ijro intizomiga bag‘ishlangan videoselektor yig‘ilishi bo‘lib o‘tdi.
Unda vazirlik markaziy apparati, hududiy boshqarmalar, bosh muhandislar va boshqa mas’ul xodimlar ishtirok etdi.
Yig‘ilish davomida hududlarda kuz-qish mavsumiga tayyorgarlik ishlari tanqidiy tahlil qilinib, ayrim hududlarda amalga oshirilgan ishlar bo‘yicha taqdim etilgan hisobotlar bilan amaldagi holat o‘rtasida jiddiy tafovutlar mavjudligi qayd etildi.
Ta’kidlanganidek, asosiy mezon hisobotlardagi raqamlar emas, balki aholining roziligi, bajarilgan ishlarning sifati va obyektlardagi haqiqiy holat hisoblanadi.
Ko‘zbo‘yamachilik va amalga oshirilmagan ishlarni bajarilgan deb rasmiylashtirish holatlariga nisbatan murosasiz munosabat bildirilishi qayd etildi.
Shuningdek, Prezidentimizning 48-son qarori ijrosi doirasida loyiha-smeta hujjatlarini ishlab chiqish, ekspertiza xulosalarini olish, pudratchilarni aniqlash va qurilish-montaj ishlarini belgilangan muddatlarda boshlash bo‘yicha ishlar qoniqarsiz tashkil etilgani tanqid qilindi. Hududlarga qisqa muddatlarda barcha obyektlar bo‘yicha jarayonlarni jadallashtirish va qurilish ishlarini joriy yil 1-avgustiga qadar boshlash yuzasidan aniq topshiriqlar berildi.
Yig‘ilishda ko‘p kvartirali uylarning umumiy mulklaridan samarali foydalanish, ularni "E-auksion" platformasi orqali ijaraga berish, "Mening uyim" axborot tizimidagi ma’lumotlarning haqqoniyligini ta’minlash, uy-joy fondini to‘liq xatlovdan o‘tkazish hamda tizimdagi kamchiliklarni bartaraf etish masalalari ham atroflicha muhokama qilindi.
▪️ Alohida ta’kidlanganidek, "Mening uyim" tizimi orqali kelib tushayotgan murojaatlar bilan ishlash sifati ham talab darajasida emas. Shu sababli, har bir murojaat joyiga chiqib o‘rganilishi va amaliy natija bilan yakunlanishi shartligi qayd etildi.
Yig‘ilish yakunida barcha hududiy rahbarlar va mas’ul xodimlar taqdim etayotgan ma’lumotlarning haqqoniyligi uchun shaxsan javobgar ekani yana bir bor eslatilib, kuz-qish mavsumiga tayyorgarlik, qaror ijrosi, raqamlashtirish, murojaatlar bilan ishlash va ijro intizomini kuchaytirish bo‘yicha aniq muddatlar belgilangan topshiriqlar berildi.