Olmaliqdagi yangi maktabgacha ta’lim muassasasida qurilish sifati tanqidiy ko‘rib chiqildi
2026-07-01 19:10:00 / Vazirlik yangiliklar
Qurilish va uy-joy kommunal xo‘jaligi vaziri o‘rinbosari Toir Alimatovning Toshkent viloyatidagi ijtimoiy soha obyektlarida olib borayotgan o‘rganishlari Olmaliq shahridagi 2-sonli davlat maktabgacha ta’lim tashkilotida davom etdi.
120 o‘ringa mo‘ljallangan mazkur maktabgacha ta’lim muassasasi yangidan barpo etilgan bo‘lib, o‘rganish davomida obyektning qurilish sifati, loyiha yechimlari, muhandislik-kommunikatsiya tarmoqlari hamda pardozlash ishlari atroflicha ko‘zdan kechirildi.
Obyektni elektr energiyasi bilan uzluksiz ta’minlash masalasiga alohida e’tibor qaratilib, transformator tarmog‘idan muassasaga elektr uzatish tizimini belgilangan talablar asosida yakunlash zarurligi qayd etildi.
Shuningdek, loyiha va qurilish ishlari yuzasidan qator jiddiy kamchiliklar aniqlandi. Xususan, bolalar harakatlanishi davomida xavfsizlikka salbiy ta’sir ko‘rsatishi mumkin bo‘lgan ayrim loyiha yechimlari tanqid qilinib, bu borada loyiha mualliflari, arxitektor hamda texnik nazorat mutaxassislarining mas’uliyati alohida qayd etildi.
Ichki pardozlash ishlarining sifati ham keskin tanqid qilindi. Jumladan, linoleum qoplamasini yotqizishda yo‘l qo‘yilgan kamchiliklar, elektr jihozlarining devorga notekis o‘rnatilgani, sanitariya xonalarida devor va pol qoplamalaridagi plitkalar orasiga surtilgan chok to‘ldiruvchi qorishma (fuga)ning sifatsiz bajarilgani, ayrim eshiklarda vaqtinchalik fanera elementlaridan foydalanilgani, asosiy kirish eshigi ostonasi yechimini qayta ko‘rib chiqish zarurligi, turli sathdagi pollar tutashgan joylarning me’yoriy holatga keltirilmagani hamda devorlardagi suvoq ishlari notekis bajarilgani yuzasidan mas’ullarga jiddiy e’tirozlar bildirildi.
“Bolalar foydalanadigan obyektlarda eng kichik kamchilik ham e’tibordan chetda qolmasligi kerak. Qurilish sifati, loyiha yechimlari va xavfsizlik masalalarida murosaga o‘rin yo‘q. Har bir aniqlangan kamchilik zudlik bilan, sifatli va belgilangan standartlar asosida bartaraf etilishi shart”, — dedi Toir Alimatov.
O‘rganish yakunida Qurilish va uy-joy kommunal xo‘jaligi vazirligi, Olmaliq shahar hokimligining Qurilish va uy-joy kommunal xo‘jaligi bo‘limi, Qurilish va uy-joy kommunal xo’jaligi sohasida nazorat qilish inspeksiyasi hamda “Infratuzilmani rivojlantirish injiniring kompaniyasi” davlat muassasasi mas’ullaridan iborat ishchi guruhni shakllantirib, aniqlangan kamchiliklarni qisqa muddatlarda bartaraf etish va bajarilgan ishlar sifatini qayta nazoratdan o‘tkazish yuzasidan qat’iy ko‘rsatmalar berildi.