Raqamlashtirish, energiya samaradorligi va tartib-intizom — asosiy vazifalar muhokama markazida
2026-06-19 21:00:00 / Vazirlik yangiliklar
Vazir o‘rinbosari Ozoda Jo‘rayeva ishtirokida ko‘p kvartirali uylarni kuz-qish mavsumiga tayyorlash, energiya samaradorligini oshirish hamda sohaga oid belgilangan vazifalar ijrosiga bag‘ishlangan yig‘ilish bo‘lib o‘tdi.
Unda vazirlikning hududiy boshqarmalari mas’ullari, departament vakillari ishtirok etdi.
Yig‘ilish davomida ko‘p kvartirali uylarni boshqarish tizimini raqamlashtirish, sohada zamonaviy axborot texnologiyalarini keng joriy etish, uy-joy fondini kuz-qish mavsumiga sifatli tayyorlash, energiya samaradorligini oshirish, shuningdek, ta’mirlash va obodonlashtirish ishlarini belgilangan reja-dasturlar asosida tashkil etish masalalari muhokama qilindi.
Ta’kidlanganidek, davlatimiz rahbarining 48-son qaroriga muvofiq ko‘p kvartirali uylarni boshqarish tizimini raqamlashtirish kommunal sohani rivojlantirishning ustuvor yo‘nalishlaridan biri hisoblanadi. Shu bois hududlarda mavjud ma’lumotlar bazalarini shakllantirish, ko‘p qavatli uylar va ularga xizmat ko‘rsatuvchi tashkilotlar faoliyatiga oid ma’lumotlarni elektron platformalar orqali yuritish hamda boshqaruv jarayonlarining shaffofligini ta’minlash bo‘yicha ishlarni jadallashtirish zarurligi qayd etildi.
Yig‘ilishda energiya samaradorligini oshirish, ko‘p qavatli uylarni kuz-qish mavsumiga puxta tayyorlash, muhandislik-kommunikatsiya tarmoqlarini soz holatga keltirish, ta’mirlash va obodonlashtirish ishlarini tasdiqlangan reja-grafiklar asosida amalga oshirish yuzasidan olib borilayotgan ishlar ham tahlil qilindi.
-Hurmatli prezidentimiz tomonidan qabul qilingan qaror boshqaruv tizimini takomillashtirish bilan birga, ko’p qavatli uylarga xizmat koʻrsatish sohasini yangi bosqichga olib chiqishni nazarda tutadi. Raqamlashtirish tizimda shaffoflik, samaradorlik va aholiga xizmat ko‘rsatish sifatini yaxshilashda muhim omil hisoblanadi. Har bir hududda bu yo‘nalishdagi ishlar amaliy natijalar bilan namoyon bo‘lishi kerak”, — deya ta’kidladi Ozoda Jo‘rayeva.
Shuningdek, ayrim hududlarda mas’ul xodimlarning raqamli texnologiyalar va axborot tizimlari bilan ishlash ko‘nikmalarini yanada rivojlantirish, ularning malakasini muntazam oshirib borish zarurligi qayd etildi. Bu borada o‘quv-seminarlar va amaliy treninglarni keng yo‘lga qo‘yish, zamonaviy raqamli yechimlardan samarali foydalanish muhim ekani ta’kidlandi.
Yig‘ilish yakunida mas’ullarga raqamlashtirish jarayonlarini jadallashtirish, ko‘p kvartirali uylarni kuz-qish mavsumiga puxta tayyorlash, ta’mirlash va obodonlashtirish ishlarini reja-dasturlar asosida o‘z vaqtida amalga oshirish, energiya samaradorligini oshirish hamda aholiga ko‘rsatilayotgan xizmatlar sifatini yanada yaxshilash yuzasidan tegishli topshiriqlar berildi.