Ko‘p qavatli uylar hududida qulay va xavfsiz yashash muhitini yaratish ishlari davom etmoqda
2026-06-17 18:00:00 / Vazirlik yangiliklar
Samarqand shahridagi ko‘p qavatli uy-joylarda yashovchi fuqarolar uchun yanada qulay, xavfsiz va obod yashash muhitini yaratish maqsadida amaliy ishlar izchil davom ettirilmoqda.
Xususan, 170 dan ortiq ko‘p qavatli uyga xizmat ko‘rsatib kelayotgan “Samarqand oltin asr” boshqaruv servis kompaniyasi ishchi-xodimlari tomonidan “Mevazor” MFY hududidagi Farobiy ko‘chasida joylashgan 4-sonli ko‘p qavatli uyda eskirgan oqova suv hamda sovuq suv tarmoqlarini yangilash ishlari amalga oshirilmoqda. Mazkur ishlar kelgusida yuzaga kelishi mumkin bo‘lgan nosozliklarning oldini olish, muhandislik-kommunikatsiya tizimlarining uzluksiz va barqaror faoliyatini ta’minlashga qaratilgan.
Shuningdek, “Yulduz” MFY hududidagi Beruniy ko‘chasida joylashgan 64, 66, 72, 80, 82 va 86-sonli ko‘p qavatli uylar atrofida keng ko‘lamli obodonlashtirish ishlari olib borilmoqda.
Maxsus avtotexnika va avtovishkalar yordamida hududdagi daraxtlarga sanitariya ishlovi berilib, qurigan hamda xavf tug‘dirayotgan shoxlar olinmoqda. Bu esa nafaqat hududning estetik qiyofasini yaxshilash, balki aholi va transport vositalari xavfsizligini ta’minlashga ham xizmat qiladi.
Shu bilan birga, Beruniy ko‘chasidagi 82-sonli ko‘p qavatli uyning 6 ta kirish yo‘lagida joriy ta’mirlash ishlari olib borilmoqda. Ta’mirlash jarayonida kirish yo‘laklarining devor va shift qismlari yangilanib, aholining kundalik foydalanishi uchun yanada qulay sharoit yaratilmoqda. Mazkur hududlarda amalga oshirilayotgan ishlar Qurilish va uy-joy kommunal xo‘jaligi vazirligi departamenti bosh mutaxassisi D.Mo‘minov hamda bosh boshqarma mas’ullari tomonidan joyida o‘rganildi.
Ta’kidlash kerakki, ushbu ishlar ko‘p qavatli uylar infratuzilmasini yaxshilash, hududlar obodligini oshirish hamda fuqarolarning turmush sifatini yuksaltirishga xizmat qiladi.