Namangan viloyatida qurilish sohasi tadbirkorlari bilan ochiq muloqot bo‘lib o‘tdi
2026-05-19 21:00:00 / Vazirlik yangiliklar
Bugun Namangan viloyatida qurilish sohasi tadbirkorlari bilan ochiq muloqot bo‘lib o‘tdi. Unda Qurilish va uy-joy kommunal xo‘jaligi vazirining birinchi o‘rinbosari J.Arashov, hududiy mutasaddi tashkilotlar rahbarlari hamda vazirlik mas’ullari videokonferensiya aloqa shaklida ishtirok etdi.
Ochiq muloqot davomida tadbirkorlar tomonidan qurilish sohasidagi amaldagi tartib-taomillar, loyiha hujjatlarini kelishish jarayonlari, muhandislik-kommunikatsiya tarmoqlariga ulanish, zamonaviy qurilish materiallari va texnologiyalaridan foydalanish hamda malakali kadrlar tayyorlash bilan bog‘liq qator masalalar ko‘tarildi.
Shuningdek, ko‘p qavatli uy-joylar qurilishida sifat va xavfsizlik talablariga rioya etish, hududlarda qurilish madaniyatini oshirish, raqamli tizimlardan samarali foydalanish hamda tadbirkorlik subyektlari uchun yaratilayotgan qulayliklar yuzasidan fikr almashildi.
Muloqot davomida tadbirkorlar tomonidan bildirilgan taklif va murojaatlarning ayrimlari yuzasidan mas’ullarga tegishli vazifalar belgilandi. Qo‘shimcha o‘rganish talab etiladigan masalalarni amaldagi tartiblar asosida ko‘rib chiqish qayd etildi.
Tadbir konstruktiv va amaliy muloqot ruhida o‘tdi.