Andijon viloyati qurilish sohasi tadbirkorlari bilan ochiq muloqot bo‘lib o‘tdi
2026-05-16 15:00:00 / Vazirlik yangiliklar
Qurilish va uy-joy kommunal xo‘jaligi vaziri Sherzod Hidoyatov ishtirokida Andijon viloyati qurilish sohasi tadbirkorlari bilan videokonferensiya aloqa shaklida ochiq muloqot tashkil etildi. Unda vazirlikning mas’ul mutasaddilari, hududiy boshqarma vakillari hamda loyiha, pudrat va boshqaruv servis tashkilotlari rahbarlari ishtirok etdi.
Muloqot davomida sohaga oid mavjud muammolar, tadbirkorlarni qiynayotgan masalalar hamda ularning taklif va tashabbuslari muhokama qilindi. Jumladan, boshqaruv servis kompaniyalari faoliyatidagi muammolar, kredit va moliyaviy majburiyatlar, ko‘p qavatli uy-joylarni ta’mirlash uchun ajratilayotgan mablag‘lar, qurilish obyektlarini loyihalashtirishdagi amaliy masalalar, normativ-huquqiy hujjatlarni takomillashtirish hamda tender jarayonlari bilan bog‘liq takliflar bildirildi.
Shuningdek, qurilish tashkilotlari reyting tizimini yanada takomillashtirish, soha tadbirkorlarini qo‘llab-quvvatlash, mavjud kamchiliklarni bartaraf etish va amaldagi normativ-huquqiy hujjatlarga qo‘shimcha hamda o‘zgartirishlar kiritish yuzasidan fikr almashildi.
Ochiq muloqot yakunida tadbirkorlar bilan doimiy muloqotlarni davom ettirish, ko‘tarilgan masalalarni tizimli ravishda ko‘rib chiqish hamda ularning yechimi bo‘yicha tegishli choralarni amalga oshirish yuzasidan kelishib olindi.