Vazirligida Jamoatchilik kengashi a’zolari ishtirokida navbatdagi yig‘ilish bo‘lib o‘tdi
2026-05-15 12:00:00 / Vazirlik yangiliklar
O‘zbekiston Respublikasi Qurilish va uy-joy kommunal xo‘jaligi vazirligida Jamoatchilik kengashi a’zolari ishtirokida navbatdagi yig‘ilish bo‘lib o‘tdi. Unda vazirlik faoliyatining ustuvor yo‘nalishlari hamda joriy yilda amalga oshirilishi rejalashtirilgan vazifalar muhokama qilindi.
Yig‘ilish davomida Jamoatchilik kengashining hozirgacha amalga oshirgan ishlari yuzasidan hisoboti tinglandi. Ta’kidlanganidek, O‘zbekiston Respublikasi Prezidentining 2018-yil 4-iyuldagi PQ-3837-son qarori hamda tasdiqlangan nizom asosida kengash zimmasiga yuklatilgan vazifalar belgilangan tartibda ijro etib kelinmoqda.
Xususan, qurilish va uy-joy kommunal xo‘jaligi sohasiga oid qarorlar, normativ-huquqiy hujjatlar, texnik va shaharsozlik kengashlari faoliyati, hududiy rivojlantirish dasturlari muhokama qilinadigan videoselektor hamda hay’at yig‘ilishlarida Jamoatchilik kengashi a’zolari muntazam ishtirok etib kelmoqda.
Shuningdek, vazirlik faoliyatida ochiqlik va oshkoralikni ta’minlash maqsadida nodavlat notijorat tashkilotlari, ommaviy axborot vositalari hamda fuqarolik jamiyati institutlari bilan hamkorlikda uchrashuvlar, seminarlar va davra suhbatlari tashkil etilayotgani qayd etildi.
Yig‘ilishda korrupsiyaga qarshi kurashish sohasida amalga oshirilayotgan tadbirlarda Jamoatchilik kengashi raisi va a’zolari faol ishtirok etib, sohada shaffoflikni ta’minlash yuzasidan takliflar bildirib kelayotgani alohida ta’kidlandi.
Shu bilan birga, vazirlik faoliyatida fuqarolarning bevosita ishtirokini ta’minlash maqsadida jamoatchilik kengashi, fuqarolik jamiyati institutlari bilan hamkorlik, ochiq muhokamalar, ijtimoiy so‘rovnomalar va onlayn platformalar faoliyati tahlil qilinib, samaradorlikni oshirish bo‘yicha takliflar ishlab chiqilayotgani aytildi.
Yig‘ilish yakunida Jamoatchilik kengashi faoliyatining ochiqligini ta’minlash maqsadida uning yig‘ilishlari va kun tartibidagi dolzarb masalalar vazirlikning rasmiy veb-sayti orqali doimiy ravishda yoritib borilishi ta’kidlandi.