Buxoro viloyati hokimligi

🔄Maktabda plastik idishlar uchun maxsus konteyner tashkil etildi

🔆 Buxoro shahridagi 29-umumta’lim maktabida atrof-muhitni muhofaza qilish, chiqindilarni saralab yig‘ish va qayta ishlash madaniyatini rivojlantirish maqsadida plastik idishlarni to‘plash uchun maxsus konteyner o‘rnatildi.

🔵 Ushbu tashabbus o‘quvchilarda ekologik mas’uliyatni oshirish, tabiatga e’tibor bilan munosabatda bo‘lish hamda yanada toza va sog‘lom muhit yaratishga xizmat qiladi.

Videoni tomosha qilish - havola

#Prezident_topshiriĝi_ijrosi

▶️1-dekabr kuni O‘zbekiston Respublikasi Prezidenti Shavkat Mirziyoyev huzurida bo‘lib o‘tgan yig‘ilishda ekologik barqarorlik, shu jumladan, chiqindilarni qayta ishlash masalalari atroflicha ko‘rib chiqildi. Shuningdek, mutasaddilarning qishga tayyorlik yuzasidan hisobotlari tinglanib, qish mavsumida energiya resurslari aholiga uzluksiz yetkazib berilishi shartligi ko‘rsatib o‘tildi.

Viloyat hokimi Botir Zaripov mazkur yig‘ilishda belgilab berilgan vazifalar ijrosini ta’minlash, aholiga zarur energiya resurslarini barqaror yetkazib berish bo‘yicha ko‘rilayotgan chora-tadbirlar bilan joyida tanishish maqsadida energota’minot korxonalarida tungi o‘rganishlar olib bordi.  

Videoni tomosha qilish - havola

Viloyat hokimi Botir Zaripov Xitoyning chiqindilarni qayta ishlash va chiqindidan energiya ishlab chiqarish sohasidagi yetakchilaridan biri — “Wangneng Environment Co., Ltd.” kompaniyasi  mutasaddilari bilan uchrashdi.

Uchrashuvda zoom platformasi orqali qatnashgan “Wangneng Environment Co., Ltd.” kompaniyasi investitsiya departamenti rahbari Xuang Yong O’zbekistonda chiqindilarni qayta ishlash tizimini isloh qilish bo‘yicha amalga oshirilayotgan ishlarga yuqori baho berdi. Investorlarga berilayotgan imtiyozlardan foydalanib, kompaniya tomonidan bu boradagi muammolarni hal etish maqsadida  Buxoro viloyatida chiqindilarni zamonaviy texnologiyalar asosida qayta ishlash va energiya ishlab chiqarish loyihasini amalga oshirishga kirishilganini qayd etdi.

Uchrashuvda tomonlar loyihani amalga oshirish bilan bog’liq tashkiliy masalalarni ko‘rib chiqishdi.

Kompaniyaning O’zbekistondagi koordinatori Ellin xonim bu loyiha samarali hamkorlik va ishonch tufayli amalga oshirishga kirishilganini aytib o’tdi. Viloyatning atrof muhitini yaxshilash, ijtimoiy—iqtisodiy rivojlantirishiga hissa qo‘shishdan mamnun ekanini bildirdi.

Viloyat rahbari xitoylik sheriklar bilan hamkorlikda amalga oshirilayotgan loyiha hududning iqtisodiy salohiyatini yanada oshirishga va elektr energiyasi ta’minotini yaxshilashga hissa qo‘shishini ta’kidladi.

Qayd etish lozimki, mazkur loyiha qiymati 180 million AQSh dollarini tashkil etib, uning amalga oshirilishi chiqindilarni poligonlarda yig‘ilishini keskin kamaytirish, ekologik holatni yaxshilash va energetika sohasida barqarorlikka erishish, shuningdek, ko’plab yangi ish o‘rinlarini yaratish imkonini beradi.  

Uchrashuv yakunida tomonlar o‘zaro hamkorlikni bosqichma-bosqich rivojlantirish yuzasidan kelishuvga erishdilar.

Ma’lumot uchun:

“Wangneng Environment Co., Ltd.” — 1993-yilda tashkil etilgan bo‘lib, bosh ofisi Chjetsyan viloyatida (Xitoy Xalq Respublikasi) joylashgan.

Kompaniya Xitoydagi eng yirik chiqindilarni qayta ishlash va chiqindidan energiya ishlab chiqarish sohasida faoliyat yurituvchi korxonalardan biri bo‘lib, 13 mingdan ortiq xodimga ega.

2024-yilda kompaniyaning umumiy daromadi 4,44 milliard AQSh dollari, sof foydasi esa 785 million AQSh dollarini tashkil etgan.

Kompaniya faoliyati Kambodja, Tailand, Vyetnam kabi mamlakatlarda ham muvaffaqiyatli amalga oshirilayotgan chiqindilarni boshqarish va energiya ishlab chiqarish loyihalarini o‘z ichiga oladi.