Buxoro viloyati hokimligi

Buni birgina joriy yilning oʻtgan davri mobaynida viloyatga tashrif buyurgan sayyohlar soni 6,3 mln. nafar, xorijiy turistlar soni 2,2 mln nafardan ortganida ham koʻrish mumkin. Bu raqam sayyohlar soni 2016-yildagiga nisbatan 14 baravarga koʻpayganini koʻrsatmoqda. Viloyat iqtisodiyotiga 614,1 mln. AQSH dollar miqdorida tushum kuzatilgani esa turizm Buxoro iqtisodiyotining muhim drayveriga aylanganidan dalolatdir. 

Ayni paytgacha Buxoro viloyatida katta-kichik hajmdagi 675 ta mehmonxona negizida 17 310 nafar mehmonni qabul qilish quvvati yaratildi. Misol uchun, oʻtgan 10 oyda jami 1953 nafar mehmon qabul qilish imkoniga ega boʻlgan 85 ta yangi mehmonxona va joylashtirish vositalari qurib bitkazildi. Turizm va unga yondosh sohalarda 80 mingdan ortiq aholi bandligi taʼminlandi.

Zamonaviy sanʼat biyennalesi davom etayotgan shu kunlarda esa Buxoro shahrida xususiy tadbirkorlar tomonidan bunyod etilgan mehmonxona foydalanishga topshirildi. 

Gʻijduvon koʻchasida ish boshlagan  112 ta xona va 224 ta oʻringa ega boʻlgan “Ramada Encore by Wyndham” mehmonxonasining loyiha qiymati 15 million AQSH dollarini tashkil etadi. International Hotel Service kompaniyasi tomonidan zamonaviy arxitektura va qulay muhit asosida qurilish ishlari olib borilgan, 8 qavatdan iborat koʻrkam bino turizmning zamonaviy barcha talablariga javob beradi. Uch yulduzli darajadagi bu joyda mehmonxona xizmati bilan bir vaqtda, konferensiya zali, basseyn, sport sogʻlomlashtirish va restoranlar kabi qoʻshimcha obyektlar faoliyat koʻrsatadi. Mehmonxona ochilishi bilan 100ga yaqin yigit-qiz doimiy ish oʻrniga ega boʻldi va ular mehmonxona boshqaruvi boʻyicha xorij tajribasini oʻzlashtirib boradi. Eʼtiborli jihati, mehmonxonada ilgʻor menejment boshqaruvini yoʻlga qoʻyish boʻyicha dunyoning top-50 reytingiga kiruvchi “Ramada Encore by” franshizasi shartnomasi imzolangan. 

Mehmonxonaning ochilish marosimida soʻzga chiqqan viloyat hokimi Botir Zaripov bu obyekt yurtimizda birinchilardan boʻlib, jahon standartlari asosida xorijiy brend boshqaruvi joriy etilgan muhtasham mehmonxona boʻlib tanilishini, bu esa Oʻzbekistonda, qolaversa, Buxoroda turizmni yanada rivojlanishida, Osiyo va Yevropa mamlakatlaridan tashrif buyuradigan sayyohlarga sifatli xizmat koʻrsatishga zamin yaratishini alohida taʼkidladi.

Mehmonxonaning boshqaruv menejeri, turkiyalik Yatishgen Muradbey  bu majmua nafaqai xorijiy sayyohlar, balki mahalliy aholi uchun qulaylik maskaniga aylanishini qayd etdi. 

Yigʻilganlar mehmonxonada yaratilgan shart-sharoitlar bilan yaqindan tanishdilar.

Viloyat hokimligi matbuot xizmati