Buxoro viloyati hokimligi

Jumladan, yaqinlashib kelayotgan yurtimiz istiqlolining 34 yilligi arafasida “Sarayon mahalla markazi" binosi foydalanishga topshirilgani mahalla maʼmuriyati hamda hudud aholisi uchun qoʻshaloq bayram boʻldi. Mahalla binosining tantanali ochilish marosimida viloyat hokimining oʻrinbosari Hafiza Artikova, tuman hokimi Otabek Qazoqov boshqa masʼul mutasaddilar, jamoatchilik vakillari, nuroniylar hamda mahalla ahli ishtrok etdilar.

Dastlab anʼanaga koʻra nuroniylar xonadonlarga qut-baraka, yurtimiz tinchligi, osmonimiz musaffo boʻlishini soʻrab duoga qoʻl ochdilar.

Tantanali marosimda soʻzga chiqqanlar hudud aholisini zamonaviy qiyofadagi, koʻrkam mahalla binosi bilan muborakbod etib, soʻnggi yillarda mamlakatimizda mahalla instituti faoliyatini yanada rivojlantirish, uni  xalqchil tuzilmaga aylantirish borasida qator ishlar amalga oshirilayotganini alohida taʼkidladilar.

Shundan soʻng mehnat faxriylari tomonidan ramziy qizil lenta qirqilgach, yigʻilganlar binoda mahalla xodimlari hamda aholi uchun yaratilgan shart-sharoit bilan yaqindan tanishdilar.

Yangi qurilgan mahalla binosida mahalla raisi, mahalladagi hokim yordamchisi, yoshlar yetakchisi, xotin-qizlar faoli hamda profilaktika inspektori uchun alohida xonalar mavjud boʻlib, ularning har biri zamonaviy moddiy-texnika vositalari va mebel jihozlari bilan taʼminlangan. Xususan, mazkur koʻrkam bino 3 qavat hamda yer toʻla qismidan iborat boʻlib, birinchi qavat ayollar va erkaklar uchun alohida sartaroshxona va savdo doʻkoni, ikkinchi qavatda asosan oʻquv markazlariga ajratilgan boʻlib, unda kasbga yoʻnaltirish markazi va fitnes zali kabi obyektlar hamda uchinchi qavatda tikuv sexi, kiyimlarni kimyoviy tozalash xonasi va yoshlar boʻsh vaqtini mazmunli tashkil etish IT markazi faoliyati yoʻlga qoʻyildi.

Maʼlumot uchun, mazkur mahalla binosi Oʻzbekiston Respublikasi Prezidentining 2021-yil 18 syentyabrdagi “Islom taraqqiyot banki va OPEK xalqaro taraqqiyot jamgʻarmasi ishtirokida qishloq joylarni barqaror rivojlantirish loyihasini amalga oshirish chora-tadbirlari toʻgʻrisida”gi qaroriga asosan "Gʻijduvon Texstroy Progress Plus" MCHJ tajribali quruvchilari tomonidan jami  4 milliard 500 million soʻmga yaqin mablagʻ evaziga bunyod etildi.

Viloyat hokimligi matbuot xizmati